ഇന്ത്യൻ ഇരുചക്ര വാഹന വിപണിയിൽ തങ്ങളുടേതായ ഇടം കണ്ടെത്തിയ ജാപ്പനീസ് നിർമാതാക്കളായ യമഹ, തങ്ങളുടെ ജനപ്രിയ സ്കൂട്ടറായ ഫാസിനോ 125-ന്റെ വിലയിൽ നേരിയ വർധനവ് വരുത്തി. ആർ-15, എംടി-15, എയ്റോക്സ് തുടങ്ങിയ മോഡലുകൾക്ക് പിന്നാലെയാണ് ഇപ്പോൾ ഫാസിനോയുടെയും വില പരിഷ്കരിച്ചിരിക്കുന്നത്. എക്സ്ഷോറൂം വിലയിൽ 1,000 രൂപയുടെ വർധനവാണ് കമ്പനി നടപ്പിലാക്കിയിരിക്കുന്നത്.
പുതിയ വില വർധനവ് ഫാസിനോയുടെ ഡിസ്ക് ബ്രേക്ക് വേരിയന്റിനും ടിഎഫ്ടി ഡിസ്പ്ലേയുള്ള ഫാസിനോ എസിനും ബാധകമാണ്. ഇതോടെ ടോപ്-സ്പെക്ക് ഫാസിനോ എസിന്റെ വില 96,200 രൂപയായും ഡിസ്ക് ബ്രേക്ക് വേരിയന്റിന്റേത് 89,000 രൂപയായും ഉയർന്നു. എന്നാൽ, ഫാസിനോ 125 ഡ്രം ബ്രേക്ക് വേരിയന്റ് പഴയ വിലയായ 76,500 രൂപയിൽ തന്നെ തുടരുമെന്ന് കമ്പനി അറിയിച്ചു.
ലോജിസ്റ്റിക്സ് ചെലവുകളിലും ഇൻപുട്ട് മെറ്റീരിയലുകളുടെ വിലയിലുമുണ്ടായ വർധനവാണ് ഈ തീരുമാനത്തിന് പിന്നിലെന്ന് യമഹ വ്യക്തമാക്കി. ചെറിയൊരു തുക മാത്രമാണ് വർധിപ്പിച്ചിരിക്കുന്നത് എന്നതിനാൽ ഇത് വിൽപ്പനയെ കാര്യമായി ബാധിക്കില്ലെന്നാണ് വിലയിരുത്തൽ. ഏപ്രിൽ മാസത്തിൽ പുറത്തിറങ്ങിയ പുതിയ ഫാസിനോ മോഡലിൽ റീഡിസൈൻ ചെയ്ത ടെയിൽ സെക്ഷനും ആകർഷകമായ ലുക്കുമാണ് നൽകിയിരിക്കുന്നത്.
8.2 bhp കരുത്തും 10.3 Nm ടോർക്കും ഉത്പാദിപ്പിക്കുന്ന 125 സിസി എഞ്ചിനാണ് ഈ സ്കൂട്ടറിന്റെ കരുത്ത്. ഇന്റഗ്രേറ്റഡ് സ്റ്റാർട്ടർ ജനറേറ്റർ (ISG), സൈലന്റ് സ്റ്റാർട്ട് സാങ്കേതികവിദ്യ, സ്റ്റാർട്ട്/സ്റ്റോപ്പ് ഫീച്ചർ എന്നിവ ഇതിന്റെ പ്രത്യേകതകളാണ്. വെറും 99 കിലോഗ്രാം ഭാരം മാത്രമുള്ള ഫാസിനോ, മികച്ച മൈലേജും പെർഫോമൻസും വാഗ്ദാനം ചെയ്യുന്നതിനാൽ ഇന്നും വിപണിയിൽ വലിയ സ്വീകാര്യതയാണ് ലഭിക്കുന്നത്.
Photo and News Source: DriveSpark
