തമിഴ്നാട് രാഷ്ട്രീയത്തിൽ വീണ്ടും അനിശ്ചിതത്വം തുടരുന്നതിനിടെ, എഐഎഡിഎംകെ (AIADMK) എംഎൽഎമാരെ പുതുച്ചേരിയിലെ റിസോർട്ടിലേക്ക് മാറ്റിയ സംഭവം വലിയ ചർച്ചയാകുന്നു. ടിവികെ (TVK) സർക്കാർ രൂപവത്കരണവുമായി ബന്ധപ്പെട്ട തർക്കങ്ങൾക്കിടെയാണ് 19-ഓളം എഐഎഡിഎംകെ എംഎൽഎമാരെ പുതുച്ചേരിയിലെ 'ദി ഷോർ ത്രിശ്വം' റിസോർട്ടിലേക്ക് മാറ്റിയത്. രാജ്യസഭ എംപിയും എടപ്പാടി പളനിസാമിയുടെ വിശ്വസ്തനുമായ സി.വി. ഷണ്മുഖമാണ് ഇതിന് നേതൃത്വം നൽകിയതെന്നാണ് റിപ്പോർട്ടുകൾ.
റിസോർട്ടിൽ ഇരുപതിലേറെ മുറികൾ ബുക്ക് ചെയ്തിട്ടുണ്ടെന്നും, എസ്. ശേഖർ, എസ്.എം. സുകുമാർ, ജയസുധ, ബാലകൃഷ്ണ റെഡ്ഡി, വിജയഭാസ്കർ, വെങ്കടാചലം തുടങ്ങിയ പ്രമുഖ എംഎൽഎമാർ ഇതിനകം അവിടെ എത്തിച്ചേർന്നതായും വിവരമുണ്ട്. വരുംദിവസങ്ങളിൽ കൂടുതൽ എംഎൽഎമാരെ ഇവിടേക്ക് മാറ്റാൻ സാധ്യതയുണ്ട്. വിജയ്യുടെ നേതൃത്വത്തിലുള്ള ടിവികെയെ പിന്തുണയ്ക്കണമെന്ന് എഐഎഡിഎംകെയിലെ ഒരു വിഭാഗം ആവശ്യപ്പെട്ടതിനെത്തുടർന്നുണ്ടായ പാർട്ടിക്കുള്ളിലെ ഭിന്നതയാണ് ഈ നീക്കത്തിന് പിന്നിലെന്നാണ് സൂചന.
അതേസമയം, ടിവികെ അധികാരത്തിൽ വരുന്നത് തടയാൻ ഡിഎംകെയും എഐഎഡിഎംകെയും കൈകോർത്തേക്കുമെന്ന അഭ്യൂഹങ്ങളും ശക്തമാണ്. ഏറ്റവും വലിയ ഒറ്റകക്ഷിയായ ടിവികെയുടെ നേതാവ് വിജയ് സർക്കാർ രൂപവത്കരിക്കാൻ അവകാശവാദം ഉന്നയിച്ച് ഗവർണറെ കണ്ടിരുന്നെങ്കിലും, കേവല ഭൂരിപക്ഷം തെളിയിക്കുന്ന രേഖകൾ ഹാജരാക്കാൻ ഗവർണർ രാജേന്ദ്ര ആർലേക്കർ നിർദ്ദേശിക്കുകയായിരുന്നു. ഇതോടെ വ്യാഴാഴ്ച നടക്കാനിരുന്ന സത്യപ്രതിജ്ഞാ ചടങ്ങ് അനിശ്ചിതത്വത്തിലായി.
നിലവിൽ 108 സീറ്റുകൾ മാത്രമുള്ള ടിവികെയ്ക്ക് കോൺഗ്രസിന്റെ പിന്തുണ മാത്രമാണുള്ളത്. മുസ്ലീം ലീഗ് ഡിഎംകെ സഖ്യത്തിൽ തുടരുമെന്ന് വ്യക്തമാക്കിയപ്പോൾ, സിപിഎം, സിപിഐ തുടങ്ങിയ പാർട്ടികൾ തങ്ങളുടെ നിലപാട് വെള്ളിയാഴ്ച പ്രഖ്യാപിക്കുമെന്ന് അറിയിച്ചിട്ടുണ്ട്. ഭൂരിപക്ഷം തെളിയിക്കാൻ 118 എംഎൽഎമാരുടെ പിന്തുണ അനിവാര്യമായിരിക്കെ, തമിഴ്നാട് രാഷ്ട്രീയം അതീവ നിർണ്ണായകമായ ഘട്ടത്തിലൂടെയാണ് കടന്നുപോകുന്നത്.
Photo and News Source: Mathrubhumi
