ഡാലസിലെ കാരോൾട്ടണിൽ നടന്ന ബിസിനസ് കൂടിക്കാഴ്ചയ്ക്കിടെയുണ്ടായ തുടർച്ചയായ വെടിവെപ്പിൽ രണ്ട് പേർ കൊല്ലപ്പെട്ടു. മൂന്ന് പേർക്ക് പരുക്കേറ്റു. ചൊവ്വാഴ്ച രാവിലെ 11 മണിയോടെ ഹൈവേ 121-ന് സമീപമുള്ള പാർക്കിങ് ഏരിയയിലാണ് സംഭവം നടന്നത്. സംഭവത്തിൽ 69 വയസ്സുകാരനായ സ്യൂങ് ഹാൻ ഹോ എന്നയാളെ പൊലീസ് പിടികൂടി. വെടിവെപ്പിന് ശേഷം ഓടി രക്ഷപ്പെടാൻ ശ്രമിച്ച ഇയാളെ പിന്തുടർന്നാണ് പൊലീസ് കീഴ്പ്പെടുത്തിയത്.
ബിസിനസ് ഇടപാടുകളെച്ചൊല്ലിയുള്ള ദേഷ്യത്തിലാണ് പ്രതി വെടിയുതിർത്തതെന്ന് പൊലീസ് അറിയിച്ചു. കൊല്ലപ്പെട്ടവരും പരുക്കേറ്റവരും മുതിർന്നവരാണ്. പരുക്കേറ്റ മൂന്ന് പേരുടെ നില നിലവിൽ തൃപ്തികരമാണെന്നും പൊലീസ് വ്യക്തമാക്കി. വെടിവെപ്പ് നടത്തിയ വ്യക്തിയും ഇരകളും തമ്മിൽ ബിസിനസ് ബന്ധമുണ്ടായിരുന്നു എന്ന് പ്രാഥമിക അന്വേഷണത്തിൽ വ്യക്തമായിട്ടുണ്ട്.
സംഭവസ്ഥലത്ത് ബോംബ് സ്ക്വാഡും എടിഎഫും പരിശോധന നടത്തി. പ്രതിയുടേതെന്ന് കരുതുന്ന ഒരു വാൻ പൊലീസ് റോബോട്ടിനെ ഉപയോഗിച്ച് പരിശോധിച്ച ശേഷം നീക്കം ചെയ്തു. പൊതുജനങ്ങൾക്ക് നിലവിൽ മറ്റ് ഭീഷണികളൊന്നുമില്ലെന്നും അന്വേഷണം പുരോഗമിക്കുകയാണെന്നും കാരോൾട്ടൺ പൊലീസ് അറിയിച്ചു. സംഭവത്തെക്കുറിച്ചുള്ള കൂടുതൽ വിവരങ്ങൾ പുറത്തുവരുന്നതോടെ പൊലീസ് അന്വേഷണം ത്വരിതപ്പെടുത്തും.
Photo and News Source: Sathyam Online
