കൊച്ചി: ബംഗളൂരുവിലെ മതിൽ ഇടിഞ്ഞ് മരിച്ച മലയാളികളുടെ കുടുംബങ്ങൾക്ക് കർണാടക സർക്കാരും മന്ത്രിയും ചേർന്ന് ധനസഹായം നൽകി. കർണാടക പിന്നാക്ക ക്ഷേമ മന്ത്രി സമീർ അഹമ്മദ് ഖാൻ നേരിട്ടെത്തി മരിച്ചവരുടെ കുടുംബങ്ങൾക്ക് 10 ലക്ഷം രൂപയും പരിക്കേറ്റവർക്ക് 2 ലക്ഷം രൂപയും കൈമാറുകയായിരുന്നു. മരിച്ച സ്മിതയുടെ കിഴുമുറിയിലെ വീട്ടിൽ ചെക്ക് കൈമാറിയ മന്ത്രി, ലതയുടെയും പരിക്കേറ്റവരുടെയും ബന്ധുക്കൾക്കും സമ്മാനിച്ചു.
കഴിഞ്ഞ ഏപ്രിൽ 29-ന് ബംഗളൂരുവിലെ ശിവാജി നഗറിലെ ബൗറിങ് ആശുപത്രിയുടെ മതിൽ ഇടിഞ്ഞുവീണാണ് ദുരന്തം സംഭവിച്ചത്. കിഴുമുറി തേക്കെയിറമ്പിൽ സ്മിത രഘു (49) ഉം കൊട്ടാരത്തു മനക്കുടിയിൽ കെ കെ ലത (59) ഉം മരണമടഞ്ഞു. രാമമംഗലം സ്വദേശികളായ പ്രീതി രാജു (51), മായാ മണികണ്ഠൻ (51), സിജി അനിൽ (45) എന്നിവർക്ക് പരിക്കേറ്റു. സാരമായ പരിക്കേറ്റ സിജി ഇപ്പോഴും ചികിത്സയിലാണ്.
ശിവാജി നഗറിൽ ശക്തമായ മഴയെത്തുടർന്ന് സമീപത്ത് വലിച്ചുകെട്ടിയിരുന്ന ടാർപോളിന് അടിയിൽ അഭയം പ്രാപിച്ചവരായിരുന്നു അപകടബാധിതർ. സർക്കാരിന്റെ 5 ലക്ഷം രൂപയ്ക്ക് പുറമെ മന്ത്രി സ്വന്തം നിലയിൽ 5 ലക്ഷം രൂപ കൂടി നൽകിയതോടെ മരിച്ചവരുടെ കുടുംബങ്ങൾക്ക് 10 ലക്ഷം രൂപ ലഭിച്ചു. പരിക്കേറ്റവർക്ക് സർക്കാരിന്റെ 1 ലക്ഷം രൂപയും മന്ത്രിയുടെ 1 ലക്ഷം രൂപയും ചേർത്ത് 2 ലക്ഷം രൂപ വീതം നൽകി.
മന്ത്രി നേരിട്ടെത്തി ചെക്കുകൾ കൈമാറിയത് ദുരന്തബാധിതരുടെ കുടുംബങ്ങൾക്ക് ആശ്വാസമായി.
Photo and News Source: Samakalika Malayalam
