യുഎഇയുടെ ആരോഗ്യ, വ്യവസായ മേഖലകളെ ആഗോള നിലവാരത്തിലേക്കുയർത്തുക എന്ന ലക്ഷ്യത്തോടെ ഡോ. ഷംഷീർ വയലിലിന്റെ നേതൃത്വത്തിലുള്ള ലൈഫ് ഫാർമയും ബുർജീൽ ഹോൾഡിങ്സും വൻ നിക്ഷേപ പദ്ധതികൾ പ്രഖ്യാപിച്ചു. അബുദാബിയിൽ നടന്ന 'മേക്ക് ഇറ്റ് ഇൻ ദി എമിറേറ്റ്സ് 2026' പ്രദർശനത്തിലാണ് ഈ നിർണ്ണായക പ്രഖ്യാപനങ്ങൾ നടന്നത്. രാജ്യത്തിന്റെ സ്വയംപര്യാപ്തതയ്ക്കും വളർച്ചയ്ക്കും കരുത്തേകുന്ന ഈ പദ്ധതികൾ, ആരോഗ്യരംഗത്തെ വിപ്ലവകരമായ മാറ്റങ്ങൾക്ക് വഴിയൊരുക്കുമെന്ന് പ്രതീക്ഷിക്കുന്നു.
ലൈഫ് ഫാർമയും എഡി പോർട്സും ചേർന്ന് അബുദാബിയിലെ കെസാദ് മേഖലയിൽ 700 മില്യൺ ദിർഹം (1,809 കോടി രൂപ) നിക്ഷേപത്തോടെ അത്യാധുനിക മരുന്ന് നിർമ്മാണ ശാല സ്ഥാപിക്കുന്ന പദ്ധതി പ്രഖ്യാപിച്ചു. ഈ പ്ലാന്റിൽ വാക്സിനുകൾ, അർബുദ ചികിത്സയ്ക്കുള്ള മരുന്നുകൾ, അത്യാധുനിക ഇൻജക്ഷനുകൾ എന്നിവ ഉൽപ്പാദിപ്പിക്കുമെന്ന് പ്രതീക്ഷിക്കുന്നു. പദ്ധതി പൂർത്തിയാകുന്നതോടെ ആയിരത്തിലധികം വിദഗ്ദ്ധ തൊഴിലാളികൾക്ക് പുതിയ തൊഴിലവസരങ്ങൾ ലഭിക്കുമെന്നും, യുഎഇ സമ്പദ്വ്യവസ്ഥയിലേക്ക് രണ്ട് ബില്യൺ ദിർഹം (5,160 കോടി രൂപ) സാമ്പത്തിക സംഭാവന ഉണ്ടാകുമെന്നും പ്രതീക്ഷിക്കുന്നു.
ബുർജീൽ ഹോൾഡിങ്സ് ശൃംഖലയുടെ വിപുലീകരണത്തിനും ഡിജിറ്റൽ പരിവർത്തനത്തിനുമായി ഒരു ബില്യൺ ദിർഹം (2,583 കോടി രൂപ) നിക്ഷേപ പദ്ധതിയും പ്രഖ്യാപിച്ചു. അത്യാധുനിക സാങ്കേതികവിദ്യകൾ ചികിത്സാരംഗത്ത് ഉൾപ്പെടുത്തി സേവനങ്ങൾ കൂടുതൽ കാര്യക്ഷമമാക്കാനും മികച്ച അനുഭവം രോഗികൾക്ക് ലഭ്യമാക്കാനുമാണ് ഈ പദ്ധതിയുടെ ലക്ഷ്യം. രക്തരോഗ ചികിത്സയിൽ വിപ്ലവമാകാൻ ലൈഫ് ഫാർമ 'എക്വിജീൻ തെറാപ്പിറ്റിക്സ്' എന്ന പേരിൽ 100 മില്യൺ ദിർഹം (258 കോടി രൂപ) നിക്ഷേപത്തോടെ ജീൻ തെറാപ്പി സംരംഭം ആരംഭിച്ചു. ഹീമോഫീലിയ, തലസ്സീമിയ, സിക്കിൾ സെൽ അനീമിയ തുടങ്ങിയ രോഗങ്ങൾക്കുള്ള നൂതന ചികിത്സാ രീതികൾ വികസിപ്പിക്കുമെന്ന് പ്രതീക്ഷിക്കുന്നു.
രാജ്യാന്തര ഗവേഷണ സ്ഥാപനങ്ങളുമായി സഹകരിച്ച് മൂന്ന് മുതൽ അഞ്ച് വർഷത്തിനുള്ളിൽ ഈ പദ്ധതിയുടെ ആദ്യഘട്ട ഫലങ്ങൾ ലഭ്യമാകുമെന്നാണ് പ്രതീക്ഷ. ബുർജീൽ മെഡിക്കൽ സിറ്റിയെ ലോകോത്തര നെക്സ്റ്റ് ജനറേഷൻ ആരോഗ്യ ഇക്കോസിസ്റ്റമാക്കി മാറ്റാനുള്ള പദ്ധതിയും പ്രദർശനത്തിൽ അവതരിപ്പിച്ചു. ഏകദേശം 3,87,000 ചതുരശ്ര മീറ്റർ വിസ്തീർണ്ണത്തിൽ ഒരുങ്ങുന്ന ഈ കേന്ദ്രത്തിൽ ഗവേഷണം, മെഡിക്കൽ വിദ്യാഭ്യാസം, അർബുദ ചികിത്സ, മരുന്ന് നിർമ്മാണം, അത്യാധുനിക സൂപ്പർ സ്പെഷ്യാലിറ്റി സൗകര്യങ്ങൾ എന്നിവയ്ക്ക് പ്രാധാന്യം നൽകും.
'ആരോഗ്യ സാങ്കേതികവിദ്യയിലും മരുന്ന് നിർമ്മാണത്തിലും യുഎഇയെ ലോകത്തിന്റെ നെറുകയിൽ എത്തിക്കാനുള്ള ദീർഘവീക്ഷണമാണ് ഈ പദ്ധതിയെന്ന്' ഡോ. ഷംഷീർ വയലിൽ പ്രസ്താവിച്ചു. 'മരുന്നുകളുടെ ഇറക്കുമതി കുറയ്ക്കുന്നതിനൊപ്പം മികച്ച ചികിത്സാ സൗകര്യങ്ങൾ സാധാരണക്കാർക്ക് ലഭ്യമാക്കുകയാണ് ഇതിലൂടെ ലക്ഷ്യമിടുന്നത്' എന്നും അദ്ദേഹം ചേർത്തു. വ്യാഴാഴ്ച വരെ നീണ്ടുനിൽക്കുന്ന പ്രദർശനത്തിൽ ബുർജീൽ ഹോൾഡിങ്സ്, ലൈഫ് ഫാർമ, ആർപിഎം, സിവ തുടങ്ങിയ വിപിഎസ് ഹെൽത്ത് ഗ്രൂപ്പ് കമ്പനികൾ സജീവമായി പങ്കെടുക്കുന്നു.
Photo and News Source: Kerala Online News
