തിരുവനന്തപുരം: പാചകവാതകത്തിന്റെ ചരിത്രത്തിലെ ഏറ്റവും ക്രൂരമായ വിലവർദ്ധന ജനജീവിതത്തെ അതിഗുരുതരമായി ബാധിക്കുകയാണെന്ന് മുഖ്യമന്ത്രി പിണറായി വിജയൻ ആവിഷ്കരിച്ചു. വാണിജ്യ ആവശ്യത്തിനുള്ള എൽപിജി സിലിണ്ടർ വില 993 രൂപയോളം ഉയർത്തി 3,000 രൂപയിലധികമാക്കിയത് ഹോട്ടൽ-റെസ്റ്റോറന്റ് മേഖലയെ തകർക്കുന്ന നടപടിയാണെന്നും അദ്ദേഹം കുറ്റപ്പെടുത്തി.
കുടിയേറ്റത്തൊഴിലാളികളും ചെറുകുടുംബങ്ങളും ആശ്രയിക്കുന്ന അഞ്ചു കിലോ എൽപിജി സിലിണ്ടറിന്റെ വില 251.50 രൂപയായി ഉയർത്തിയത് സംസ്ഥാനത്തെ നിയമസഭാ തെരഞ്ഞെടുപ്പിനു ശേഷമാണ്. പശ്ചിമേഷ്യൻ പ്രതിസന്ധി മൂലം പാചകവാതക ക്ഷാമം നേരിടുന്ന ഹോട്ടൽ വ്യവസായത്തിന് ഈ വിലവർദ്ധന താങ്ങാനാവില്ല.
അന്യായമായ ഈ വിലവർദ്ധനയുടെ ഭാരം സാധാരണ ജനങ്ങളുടെ തലയിലാണ് വീഴുന്നത്. കേരളത്തിലും മറ്റു സംസ്ഥാനങ്ങളിലും ചെറുകിട സ്ഥാപനങ്ങൾ പൂട്ടേണ്ടി വരുന്ന അവസ്ഥയാണ്. എണ്ണക്കമ്പനികളുടെ ലാഭം മാത്രം മുന്നിർത്തി ജനങ്ങളുടെ മേൽ അധികഭാരം അടിച്ചേൽപ്പിക്കുന്ന പ്രവണത അംഗീകരിക്കാനാവില്ല. കോർപ്പറേറ്റ് താത്പര്യങ്ങൾ സംരക്ഷിക്കുന്ന കേന്ദ്രനയം തിരുത്തപ്പെടണമെന്ന് മുഖ്യമന്ത്രി ആവശ്യപ്പെട്ടു. അമിതമായി ഉയർത്തിയ വില ഉടൻ പിൻവലിക്കണമെന്നും അദ്ദേഹം ആവശ്യപ്പെട്ടു.
Photo and News Source: Samakalika Malayalam
