ഉത്തർപ്രദേശിലെ അംബേദ്കർ നഗർ ജില്ലയിൽ വീടിനുള്ളിൽ നാല് കുട്ടികളെ മർദിച്ചുകൊലപ്പെടുത്തിയ നിലയിൽ കണ്ടെത്തി. സംഭവസ്ഥലത്ത് നിന്നും കുട്ടികളുടെ അമ്മ നാസിയ ഖാത്തൂൻ കാണാതായതോടെ സംഭവം ദുരൂഹമായി മാറിയിരിക്കുന്നു. സൗദി അറേബ്യയിൽ ജോലി ചെയ്യുന്ന നിയാസിന്റെ മക്കളായ 14 വയസ്സുള്ള ഷഫീഖ്, 10 വയസ്സുള്ള സൗദ്, 8 വയസ്സുള്ള ഉമർ, 7 വയസ്സുള്ള സാദിയ എന്നിവരെയാണ് കൊലപ്പെടുത്തിയത്.
ശനിയാഴ്ച ഉച്ചയ്ക്ക് മൂന്ന് മണിയോടെയാണ് സംഭവം നടന്നത്. രാവിലെ മുതൽ വീട് പൂട്ടിയിരുന്നത് പ്രദേശവാസികൾ ശ്രദ്ധിച്ചിരുന്നു. പോലീസ് സംഘം വീടിനുള്ളിൽ പ്രവേശിച്ചപ്പോൾ കട്ടിലിൽ രക്തത്തിൽ കുളിച്ച നിലയിൽ കിടക്കുന്ന കുട്ടികളുടെ മൃതദേഹം കണ്ടെത്തി. വീടിന്റെ വാതിൽ അകത്ത് നിന്ന് പൂട്ടിയ നിലയിലായിരുന്നു.
കുട്ടികളെ ഇഷ്ടിക പോലെയുള്ള ആയുധം കൊണ്ട് തലയ്ക്ക് ആക്രമിച്ചതായി പോലീസ് സ്ഥിരീകരിച്ചു. ഫോറൻസിക് പരിശോധന പുരോഗമിക്കുകയാണ്. വീടിനുള്ളിൽ നിന്നും പരിസരത്തുനിന്നും തെളിവുകൾ ശേഖരിച്ചു വരുന്നു. അമ്മയെ കാണാതായത് സംഭവത്തെ കൂടുതൽ ദുരൂഹമാക്കുന്നു. തട്ടിക്കൊണ്ടുപോയതാണോ അതോ മറ്റെന്തെങ്കിലും സംഭവിച്ചതാണോ എന്ന് അന്വേഷണം നടത്തി വരുന്നു.
Photo and News Source: Sathyam Online
