മൈസൂരിലെ കോളേജ് ഹോസ്റ്റലുകളിൽ വിദ്യാർഥികൾക്ക് വൃത്തിഹീനമായ ഭക്ഷണം വിതരണം ചെയ്ത സംഭവത്തിൽ കർണാടക സർക്കാർ കർശന നടപടി സ്വീകരിച്ചു. 'ഗ്ലോബൽ എജ്യൂക്കേഷൻ കൺസൾട്ടൻസി'യുടെ മെസ്സും കോമൺ കിച്ചണും ആരോഗ്യവകുപ്പ് പൂട്ടിച്ചു. സ്ഥാപനത്തിന്റെ ലൈസൻസും റദ്ദാക്കി. വിദ്യാർഥികളുടെ പരാതിയെത്തുടർന്ന് മാധ്യമങ്ങളിൽ വാർത്തയായ ഈ സംഭവത്തിൽ ആരോഗ്യവകുപ്പ് ഉദ്യോഗസ്ഥർ പരിശോധന നടത്തി.
വൃത്തിഹീനമായ അടുക്കളയിൽ ചോറിൽ പാറ്റയും ചപ്പാത്തിയിൽ പ്ലാസ്റ്റിക്കും കോഴിക്കറിയിൽ കോഴിത്തൂവലും ചോരയും കണ്ടെത്തി. ഫ്രീസറിൽ ഇറച്ചിയുടെ ചോര തളംകെട്ടി നിൽക്കുകയും ചെളിവെള്ളം ഉപയോഗിച്ച് പാത്രങ്ങൾ കഴുകുകയും ചെയ്തതായി വിദ്യാർഥികൾ വെളിപ്പെടുത്തി. അടുക്കളയിൽ എലികളും കണ്ടെത്തിയതോടെ വാർത്ത പുറത്തുവന്നു. തുടർന്ന് മൈസൂരു നഗരത്തിലെ ഏഴോളം കോളേജ് ഹോസ്റ്റലുകളിലേക്കുള്ള ഭക്ഷണ വിതരണം നിർത്തി. വിദ്യാർഥികൾക്ക് പകരം ഭക്ഷണ സംവിധാനം ഏർപ്പാടാക്കിയിട്ടുണ്ട്. കെ.സി. വേണുഗോപാൽ എം.പി.യും ആരോഗ്യമന്ത്രിയോട് നടപടി സ്വീകരിക്കാൻ ആവശ്യപ്പെട്ടിരുന്നു.
Photo and News Source: Mathrubhumi
