കൊൽക്കത്ത: ബംഗാളിൽ 15 ബൂത്തുകളിൽ വീണ്ടും വോട്ടെടുപ്പ് നടക്കുന്നു. മഗ്രാഹാത് വെസ്റ്റിൽ 11 ബൂത്തുകളിലും ഡയമണ്ട് ഹാർബറിൽ 4 ബൂത്തുകളിലും പോളിംഗ് ആരംഭിച്ചു. രാവിലെ 7 മണിമുതൽ വൈകീട്ട് 6 മണിവരെ പോളിംഗ് തുടരും. ഏപ്രിൽ 29-ന് രണ്ടാംഘട്ടത്തിൽ നടന്ന ബൂത്തുകളിലാണ് റീപോളിംഗ്. വോട്ടെടുപ്പിൽ ക്രമക്കേട് റിപ്പോർട്ട് ചെയ്യപ്പെട്ടതിനെ തുടർന്നാണ് ഈ നടപടി.
ഡയമണ്ട് ഹാർബറിൽ 29 പരാതികളും മഗ്രാഹാത് വെസ്റ്റിൽ 13 പരാതികളും ലഭിച്ചതോടെ, ഉദ്യോഗസ്ഥരുടെ റിപ്പോർട്ട് അടിസ്ഥാനമാക്കി റീപോളിംഗ് ഉത്തരവായി. കനത്ത പോലീസ് സുരക്ഷയോടെയാണ് വോട്ടെടുപ്പ് നടക്കുന്നത്. ബൂത്തുകളുടെ 200 മീറ്റർ ചുറ്റളവിൽ നിരോധനാജ്ഞ പ്രഖ്യാപിച്ചിരിക്കുകയാണ്. സംഘർഷം ഒഴിവാക്കാൻ 5 പേരിൽ കൂടുതൽ കൂട്ടം കൂടരുതെന്ന നിയമം പാലിക്കപ്പെടുന്നു.
ബംഗാളിലെ രണ്ട് ഘട്ടങ്ങളിലായി നടന്ന വോട്ടെടുപ്പിൽ 92.47% പോളിംഗ് രേഖപ്പെടുത്തി. സംസ്ഥാന ചരിത്രത്തിലെ ഏറ്റവും ഉയർന്ന പോളിംഗ് ശതമാനമാണിത്. റീപോളിംഗ് ബൂത്തുകളിൽ സുരക്ഷിതവും നിയമാനുസൃതവുമായ വോട്ടെടുപ്പ് ഉറപ്പാക്കാൻ ഉദ്യോഗസ്ഥർ ശ്രദ്ധിക്കുന്നു.
Photo and News Source: Sathyam Online
