ക്യൂലക്സ് കൊതുകുകൾ വഴി പകരുന്ന വെസ്റ്റ് നൈൽ പനി മുതിർന്നവരിൽ ഗുരുതരമായ ആരോഗ്യപ്രശ്നങ്ങൾക്ക് കാരണമാകുന്നു. ജപ്പാൻ ജ്വരത്തിനു സമാനമായ ഈ രോഗം പ്രധാനമായും 50 വയസ്സിനു മുകളിലുള്ളവരിലാണ് കണ്ടുവരുന്നത്. പക്ഷികളിൽ നിന്നും രോഗബാധിതരായ കൊതുകുകൾ കടിക്കുന്നതിലൂടെയാണ് മനുഷ്യരിലേക്ക് വൈറസ് എത്തുന്നത്.
രോഗം ബാധിക്കുന്ന പലരിലും ലക്ഷണങ്ങൾ പ്രകടമാകില്ലെങ്കിലും ചിലരിൽ പനി, വിട്ടുമാറാത്ത തലവേദന, ശരീരവേദന, ചർമ്മത്തിലെ തടിപ്പുകൾ എന്നിവ അനുഭവപ്പെടാം. രോഗപ്രതിരോധ ശേഷി കുറഞ്ഞവരിലും പ്രായമായവരിലും അണുബാധ നാഡീവ്യൂഹത്തെ ബാധിച്ച് എൻസെഫലൈറ്റിസ് അല്ലെങ്കിൽ മെനിഞ്ചൈറ്റിസ് പോലുള്ള ഗുരുതരമായ അവസ്ഥകളിലേക്ക് നയിച്ചേക്കാം.
നിലവിൽ ഈ വൈറസിനെതിരെ പ്രത്യേക വാക്സിനുകളോ മരുന്നുകളോ ഇല്ല. കൊതുകുകടി ഏൽക്കാതെ ശ്രദ്ധിക്കുക, ശരീരം മൂടുന്ന വസ്ത്രങ്ങൾ ധരിക്കുക, കൊതുകുവലകൾ ഉപയോഗിക്കുക, കൊതുകിനെ അകറ്റുന്ന ലേപനങ്ങൾ പുരട്ടുക എന്നിവയാണ് രോഗം തടയാനുള്ള പ്രധാന മാർഗ്ഗങ്ങൾ. പരിസരങ്ങളിൽ വെള്ളം കെട്ടിനിൽക്കാതെ നോക്കുകയും കൊതുകുനശീകരണ പ്രവർത്തനങ്ങളിൽ ഏർപ്പെടുകയും ചെയ്യേണ്ടത് അത്യാവശ്യമാണ്.
Photo and News Source: Malayalam Express
