പെരുമ്പാവൂർ പട്ടണത്തിലെ ഏക തണൽമരക്കൂട്ടം രാജഭരണകാലത്തെ ബോയ്സ് സ്കൂൾ മൈതാനത്താണ്. ചരിത്രത്തിന്റെ അവശിഷ്ടം പോലെ നിലകൊള്ളുന്ന ഈ മരക്കൂട്ടങ്ങൾ, വെളുത്തു കരിയുന്ന വേനലിൽ പൊതുജനങ്ങൾക്ക് ആശ്വാസം പകർന്നുകൊണ്ടിരിക്കുന്നു.
മിനി സിവിൽ സ്റ്റേഷനു സമീപമുള്ള സർക്കാർ ആശുപത്രിയുടെ തൊട്ടടുത്തുള്ള ഈ മൈതാനത്തെ കൂറ്റൻ തണൽമരങ്ങൾ, തിരുവിതാംകൂർ രാജഭരണകാലത്ത് സ്ഥാപിതമായ വിദ്യാലയത്തിന്റെ പ്രതാപം പേറുന്നു. നൂറ്റാണ്ടിലധികം പഴക്കമുള്ള ആൽമരവും മറ്റു വൃക്ഷങ്ങളും ഈ പട്ടണത്തിന്റെ ചരിത്രവും ശ്വാസവുമാണ്.
താപനില 40 ഡിഗ്രിയിലേക്ക് ഉയരുമ്പോഴും, ഈ മരങ്ങൾക്കിടയിൽ അനുഭവപ്പെടുന്നത് നേർത്ത തണുപ്പാണ്. പടർന്നു പന്തലിക്കുന്ന ഇലച്ചാർത്തുകൾ സൂര്യപ്രകാശത്തെ തടഞ്ഞുനിർത്തുന്നു. ഉച്ചസമയങ്ങളിൽ കളിക്കാനും വിശ്രമിക്കാനും കുട്ടികൾ ഇവിടെ ഒത്തുകൂടുന്നു. വഴിയാത്രക്കാർക്ക് ഈ മൈതാനം വലിയ ആശ്വാസകേന്ദ്രമാണ്. വാഹനങ്ങളും തണൽ തേടി ഇവിടെ പാർക്കിംഗ് ഇടമാക്കുന്നു.
Photo and News Source: Sathyam Online
