തിരുവനന്തപുരം: കേരളത്തിൽ വൈദ്യുതി ഉപയോഗം ചരിത്രത്തിലെ ഏറ്റവും ഉയർന്ന നിലയിലേക്ക് ഉയർന്നിട്ടും സംസ്ഥാനത്ത് വൈദ്യുതി പ്രതിസന്ധി ഉണ്ടാകില്ലെന്ന് വൈദ്യുതി മന്ത്രി കെ. കൃഷ്ണൻകുട്ടി വ്യക്തമാക്കി. പുറത്തുനിന്ന് കൂടുതൽ വൈദ്യുതി വാങ്ങേണ്ടി വരുമെങ്കിലും ബിൽ വർധനയോ പവർക്കട്ടോ ഉണ്ടാകില്ലെന്നും അദ്ദേഹം സൂചിപ്പിച്ചു. നാളെ ഒരു അടിയന്തര യോഗം ചേരുമെന്നും മന്ത്രി അറിയിച്ചു.
വേനൽച്ചൂടിന്റെ ഉച്ചത്തിലും സംസ്ഥാനത്തിന്റെ വൈദ്യുതി ആവശ്യം സർവകാല റെക്കോർഡുകൾ തകർത്തു. തിങ്കളാഴ്ച 11.21617 കോടി യൂണിറ്റ് വൈദ്യുതി ഉപയോഗിച്ചു. വൈകുന്നേരത്തെ ഏറ്റവും ഉയർന്ന ആവശ്യം 5933 മെഗാവാട്ടായിരുന്നു. മാർച്ച് 26ലെ 5836 മെഗാവാട്ടിന്റെ റെക്കോർഡും തകർന്നു. സംസ്ഥാനം പുറത്തുനിന്ന് 86.014 ദശലക്ഷം യൂണിറ്റ് (4270 മെഗാവാട്ട്) വൈദ്യുതി വാങ്ങി. ആഭ്യന്തര ഉൽപ്പാദനം 26.147 ദശലക്ഷം യൂണിറ്റായിരുന്നു. ഇതിൽ 10.56 ദശലക്ഷം യൂണിറ്റ് ഇടുക്കിയിൽ നിന്നും ലഭിച്ചു. സോളാർ, കാറ്റ് എന്നിവയിൽ നിന്ന് 2.223 ദശലക്ഷം യൂണിറ്റ് ഉത്പാദിപ്പിച്ചു.
മുൻപ് വൈകിട്ട് 6 മുതൽ 10 വരെയായിരുന്നു പീക്ക് ലോഡ്. ഇപ്പോൾ അത് പുലർച്ചെ വരെ നീണ്ടുനിൽക്കുന്നു. പുലർച്ചെ രണ്ടരയ്ക്ക് ഉപയോഗം 5000 മെഗാവാട്ടിൽ താഴെയെത്തുന്നു. പ്രവചനങ്ങൾക്കപ്പുറം വൈദ്യുതി ഉപയോഗം വർദ്ധിച്ചിട്ടും സംസ്ഥാനത്ത് നിയന്ത്രണം നിലനിർത്തിയിട്ടുണ്ട്.
Photo and News Source: Sathyam Online
