ഫെബ്രുവരിയിലെ പഞ്ചാബ് നിയമസഭാ തിരഞ്ഞെടുപ്പിന് മുന്നോടിയായി നടന്ന ഏഴ് ആം ആദ്മി പാർട്ടി (എഎപി) രാജ്യസഭാംഗങ്ങളുടെ ബിജെപിയിലേക്കുള്ള മാറ്റം കനത്ത പ്രതിസന്ധിയാണ്. രാജ്യസഭയിൽ മാത്രമല്ല, പഞ്ചാബ് നിയമസഭയിലും ഈ പിളർപ്പെത്തുമോ എന്ന ഭീതിയിലാണ് എഎപി. പാർട്ടിയുടെ വളർച്ചയിൽ നിർണായക പങ്കുവഹിച്ചവരും കെജ്രിവാളിന്റെ വിശ്വസ്തരുമായ ഇവരെ പിടിച്ചെടുക്കാൻ ബിജെപി നടത്തിയ തന്ത്രമാണ് “ഓപറേഷൻ താമര”.
വാഗ്ദാനങ്ങളും ഭയപ്പെടുത്തലും ഉപയോഗിച്ചുള്ള വശീകരണമാണ് ഈ പ്രവർത്തനത്തിന്റെ മുഖം. ഇഡി, സിബിഐ കേസുകളിൽ അന്വേഷണം നേരിടുന്ന എംപിമാരുടെ മാറ്റം ശ്രദ്ധേയമാണ്. കേന്ദ്ര ഏജൻസികളുടെ ഭീഷണിയെ തുടർന്നുള്ള രക്ഷപ്പെടലിന്റെ മാർഗമായാണ് ഇത് കണ്ടെന്നും ആരോപണമുണ്ട്. രാഘവ് ഛദ്ദയുടെ ബിജെപിയോടുള്ള താത്പര്യം മുൻപേ തന്നെ പ്രകടമായിരുന്നു. ഡൽഹി മദ്യനയക്കേസിൽ കെജ്രിവാളിനെ കോടതി വെറുതെ വിട്ടപ്പോൾ ഛദ്ദ പ്രതികരിക്കാതിരുന്നതും തന്റെ എക്സ് അക്കൗണ്ടിൽ നിന്നും ബിജെപിയുമായി ബന്ധപ്പെട്ട പഴയ പോസ്റ്റുകൾ നീക്കിയതും ഇതിന്റെ സൂചനയായിരുന്നു.
എഎപി ഛദ്ദയെ രാജ്യസഭാ ഉപനേതാവ് പദവിയിൽ നിന്ന് നീക്കിയപ്പോൾ ഡൽഹി ബിജെപി അദ്ദേഹത്തെ പിന്തുണച്ചു. രാഷ്ട്രീയ വഞ്ചനയുടെ ഈ നീക്കം പാർട്ടിയുടെ ഭാവി രൂപരേഖയെ തന്നെ മാറ്റിമറിക്കുമെന്ന ആശങ്കയാണ് നിലവിൽ ഉയർന്നിരിക്കുന്നത്.
Photo and News Source: Siraj Live
