മൈക്രോസോഫ്റ്റ് തങ്ങളുടെ 51 വർഷത്തെ ചരിത്രത്തിൽ ആദ്യമായി അമേരിക്കയിലെ ജീവനക്കാർക്കായി സ്വമേധയാ വിരമിക്കൽ പദ്ധതി പ്രഖ്യാപിച്ചു. 1,25,000 ജീവനക്കാരിൽ ഏഴ് ശതമാനം പേർക്ക് ഈ ആനുകൂല്യം ലഭിക്കും. മുൻപ് ചെലവ് ചുരുക്കലിന്റെ ഭാഗമായി പിരിച്ചുവിടലുകൾ നടത്തിയിരുന്ന കമ്പനി, ഇത്തവണ കൂടുതൽ മാനുഷിക സമീപനമാണ് സ്വീകരിച്ചിരിക്കുന്നത്.
ഓഹരി വിലയിലുണ്ടായ ഇടിവും ആർട്ടിഫിഷ്യൽ ഇന്റലിജൻസ് മേഖലയിലെ വർദ്ധിച്ചുവരുന്ന നിക്ഷേപങ്ങളും മൂലമുള്ള സാമ്പത്തിക സമ്മർദ്ദമാണ് ഈ തീരുമാനത്തിന് പിന്നിലെ പ്രധാന കാരണം. വിരമിക്കാനുള്ള യോഗ്യതയ്ക്ക് പ്രത്യേക മാനദണ്ഡങ്ങൾ നിശ്ചയിച്ചിട്ടുണ്ട്. ജീവനക്കാരന്റെ പ്രായവും സേവനകാലയളവും കൂടി 70-ഓ അതിൽ കൂടുതലോ ആയിരിക്കണം. ഉദാഹരണത്തിന്, 18 വർഷം പ്രവർത്തിച്ച 52 വയസ്സുകാരന് ഈ പദ്ധതി തിരഞ്ഞെടുക്കാം.
സീനിയർ ഡയറക്ടർ ലെവൽ 67-ന് താഴെയുള്ളവർക്കും സെയിൽസ് ഇൻസെന്റീവ് പ്ലാനിലെ ജീവനക്കാരെ ഒഴികെയുള്ളവർക്കും മാത്രമേ ഈ ആനുകൂല്യം ലഭിക്കൂ. വൈസ് പ്രസിഡന്റുമാർക്കും എക്സിക്യൂട്ടീവ് തലത്തിലുള്ളവർക്കും ഈ സൗകര്യം ലഭ്യമല്ല. യോഗ്യരായ ജീവനക്കാർക്ക് മെയ് 7-ന് അറിയിപ്പ് ലഭിക്കും. തീരുമാനം എടുക്കാൻ 30 ദിവസത്തെ സമയം നൽകിയിട്ടുണ്ട്. വിരമിക്കുന്നവർക്ക് ഉദാരമായ പിന്തുണ നൽകുമെന്ന് കമ്പനിയുടെ ചീഫ് പീപ്പിൾ ഓഫീസർ ആമി കോൾമാൻ വ്യക്തമാക്കി.
Photo and News Source: Kerala Online News
