ന്യൂഡൽഹി | ഇന്ത്യയിൽ വിറ്റഴിക്കപ്പെട്ട 207 ഓഡി കാറുകളുടെ ബ്രേക്ക് സംവിധാനത്തിൽ പ്രശ്നം കണ്ടെത്തിയതിനെ തുടർന്ന് കമ്പനി തിരിച്ചുവിളിക്കൽ നടപടി സ്വീകരിച്ചു. 2018 ഫെബ്രുവരി 2 മുതൽ 2024 ജൂൺ 11 വരെ നിർമ്മിച്ച ഇ-ട്രോൺ, ക്യൂ8 ഇ-ട്രോൺ മാതൃകകളിലെ ബ്രേക്ക് സെർവോ പുഷ് റോഡിന്റെ ബോൾട്ട് കണക്ഷൻ ബലക്ഷയമുണ്ടാക്കുന്നതായി കമ്പനി സ്ഥിരീകരിച്ചു. ഇത് ബ്രേക്കിംഗ് സംവിധാനത്തെ ദുർബലപ്പെടുത്തുകയും അടിയന്തര സാഹചര്യങ്ങളിൽ പ്രതികരണം കുറയ്ക്കുകയും ചെയ്യും.
വാഹനത്തിന്റെ സെന്റർ കൺസോളിലെ ഇലക്ട്രോമെക്കാനിക്കൽ പാർക്കിംഗ് ബ്രേക്ക് ബട്ടൺ ഉപയോഗിച്ച് അടിയന്തര സാഹചര്യങ്ങളിൽ വാഹനം നിയന്ത്രിതമായി നിർത്താൻ കഴിയുമെന്ന് ഓഡി വ്യക്തമാക്കി. ബാധിത വാഹനങ്ങളുടെ ഉടമകൾക്ക് കമ്പനി നേരിട്ട് ബന്ധപ്പെടുകയും സൗജന്യ പരിശോധനയും അറ്റകുറ്റപ്പണികളും വാഗ്ദാനം ചെയ്യുകയും ചെയ്യുന്നു. സുരക്ഷയെ ഉറപ്പാക്കുന്നതിനായി ഈ നടപടി സ്വീകരിച്ചിരിക്കുന്നതായി ഓഡി ഇന്ത്യ അറിയിച്ചു.
Photo and News Source: Siraj Live
