കൊച്ചിയിലെ വൈറ്റില ജംഗ്ഷനിലെ രൂക്ഷമായ ഗതാഗതക്കുരുക്കിന് പരിഹാരമായി ഒന്നരക്കോടി രൂപയുടെ വികസന പദ്ധതികൾ നടപ്പിലാക്കാൻ ജില്ലാ ഭരണകൂടം തീരുമാനിച്ചു. ജില്ലാ കളക്ടർ ജി. പ്രിയങ്കയുടെ നേതൃത്വത്തിൽ ചേർന്ന ഉന്നതതല യോഗത്തിലാണ് ഇത് സംബന്ധിച്ച നിർദ്ദേശങ്ങൾ നൽകിയത്. റോഡ് സേഫ്റ്റി അതോറിറ്റി അനുവദിച്ച തുക ഉപയോഗിച്ച് പി.ഡബ്ല്യു.ഡി (എൻ.എച്ച് വിഭാഗം) മുഖേനയാണ് നിർമ്മാണ പ്രവർത്തനങ്ങൾ നടക്കുക.
അടുത്ത ആഴ്ച തന്നെ പ്രവൃത്തികൾ ആരംഭിക്കണമെന്നും ജൂലൈ 30-നകം യുദ്ധകാലാടിസ്ഥാനത്തിൽ പദ്ധതി പൂർത്തിയാക്കണമെന്നും കളക്ടർ കർശന നിർദ്ദേശം നൽകി. ഈ പദ്ധതി നടപ്പിലാക്കുന്നതോടെ വൈറ്റിലയിലെ ട്രാഫിക് തിരക്കിൽ 60 ശതമാനത്തോളം കുറവുണ്ടാകുമെന്നാണ് അധികൃതരുടെ വിലയിരുത്തൽ. നിർമ്മാണ പ്രവർത്തനങ്ങൾ കാരണം ഗതാഗതം തടസ്സപ്പെടാതിരിക്കാൻ മതിൽ പൊളിക്കുന്നത് ഉൾപ്പെടെയുള്ള സിവിൽ ജോലികൾ രാത്രികാലങ്ങളിൽ മാത്രമായിരിക്കും നടത്തുക.
പദ്ധതിയുടെ ഭാഗമായി വൈറ്റില ജംഗ്ഷനിൽ നിന്ന് കണിയാമ്പുഴ ഭാഗത്തേക്ക് 120 മീറ്റർ നീളത്തിലും 12.5 മീറ്റർ വീതിയിലും പുതിയ റോഡ് നിർമ്മിക്കും. സഹോദരൻ അയ്യപ്പൻ റോഡിൽ നിന്ന് വരുന്ന ഹെവി വാഹനങ്ങളെ കണിയാമ്പുഴ റോഡ് വഴി ഹബ് എക്സിറ്റിലേക്ക് തിരിച്ചുവിടും. ചെറിയ വാഹനങ്ങളെ സിഗ്നൽ കടന്ന് സ്റ്റേറ്റ് ഹൈവേയിലൂടെ കടത്തിവിടും. ഇതിലൂടെ ജംഗ്ഷനിലെ സമയനഷ്ടം വലിയൊരു പരിധിവരെ കുറയ്ക്കാൻ സാധിക്കും.
വൈറ്റില ജംഗ്ഷനെ ഭാവിയിൽ പൂർണ്ണമായും സിഗ്നൽ രഹിതമാക്കുന്നതിനെക്കുറിച്ചും യോഗത്തിൽ ചർച്ചകൾ നടന്നു. ഇ. ശ്രീധരൻ ഉൾപ്പെടെയുള്ളവർ സമർപ്പിച്ച വിവിധ പ്ലാനുകൾ ക്രോഡീകരിച്ച് പ്രായോഗികമായ ഒരു പദ്ധതി തയ്യാറാക്കാൻ ഈ മാസം 19-ന് വീണ്ടും യോഗം ചേരും. സബ് കളക്ടർ ഗ്രന്ഥേ സായി കൃഷ്ണ, കൊച്ചി കോർപ്പറേഷൻ കൗൺസിലർമാർ, ആർ.ടി.ഒ, ട്രാഫിക് പോലീസ് ഉദ്യോഗസ്ഥർ തുടങ്ങിയവർ യോഗത്തിൽ പങ്കെടുത്തു.
Photo and News Source: Sathyam Online
