കേരളത്തിൽ മിൽമ പാൽ വില വർധിപ്പിക്കാൻ തീരുമാനം. മെയ് 21 മുതൽ പുതുക്കിയ നിരക്കുകൾ പ്രാബല്യത്തിൽ വരും. ലിറ്ററിന് നാല് രൂപ വീതമാണ് വർധിപ്പിക്കുന്നത്. വരും ദിവസങ്ങളിൽ ചേരുന്ന മിൽമ ഡയറക്ടർ ബോർഡ് യോഗത്തിൽ ഇതിന് ഔദ്യോഗിക അംഗീകാരം നൽകും. ഏറെ നാളത്തെ ചർച്ചകൾക്കും ആലോചനകൾക്കും ശേഷമാണ് വില വർധനവ് നടപ്പിലാക്കുന്നത്.
നേരത്തെ ഏപ്രിലിൽ ചേർന്ന യോഗത്തിൽ നിയമസഭാ തെരഞ്ഞെടുപ്പ് ഫലപ്രഖ്യാപനത്തിന് ശേഷം വില വർധിപ്പിക്കാൻ തീരുമാനിച്ചിരുന്നു. സർക്കുലർ റെസല്യൂഷൻ വഴി വില വർധന പാസാക്കാൻ ശ്രമം നടന്നെങ്കിലും 18 അംഗങ്ങളുള്ള ഡയറക്ടർ ബോർഡിലെ എട്ടുപേർ മാത്രമാണ് അന്ന് ഒപ്പിട്ടത്. അതിനാൽ ഔദ്യോഗിക ബോർഡ് യോഗം ചേർന്ന് തീരുമാനം ഉറപ്പിക്കാനാണ് നിലവിലെ നീക്കം.
പുതുക്കിയ വില വർധനയിലൂടെ ലഭിക്കുന്ന തുകയുടെ 83.75 ശതമാനം അഥവാ ലിറ്ററിന് 3.33 രൂപ കർഷകർക്ക് നേരിട്ട് ലഭിക്കും. ബാക്കി തുകയിൽ 6.25 ശതമാനം വീതം ക്ഷീര സഹകരണ സംഘങ്ങൾക്കും ഡീലർമാർക്കും നൽകും. കൂടാതെ 2.5 ശതമാനം മിൽമയ്ക്കും 0.75 ശതമാനം കർഷക ക്ഷേമനിധിയിലേക്കും മാറ്റിവെക്കും.
പാലിന്റെ വില വർധിക്കുന്നതോടെ മിൽമ വിപണിയിലെത്തിക്കുന്ന തൈര്, നെയ്യ്, പേഡ തുടങ്ങിയ അനുബന്ധ ഉൽപ്പന്നങ്ങളുടെ വിലയിലും ആനുപാതികമായ വർധനവ് ഉണ്ടായേക്കും. ഇത് സാധാരണക്കാരായ ഉപഭോക്താക്കൾക്ക് വലിയ സാമ്പത്തിക ബാധ്യതയായി മാറും.
Photo and News Source: Siraj Live
