കോഴിക്കോട്: കെഎസ്ആര്ടിസി പ്രീമിയം ബസിന്റെ ചില്ല് തകര്ത്ത സംഭവവുമായി ബന്ധപ്പെട്ട് തനിക്കെതിരെ നടക്കുന്ന വ്യാജ പ്രചാരണങ്ങള്ക്കെതിരെ നിയമനടപടി സ്വീകരിക്കുമെന്ന് ഡിവൈഎഫ്ഐ സംസ്ഥാന പ്രസിഡന്റ് വി വസീഫ് വ്യക്തമാക്കി. ബസിന്റെ ചില്ല് തകര്ത്തത് തന്റെ ഭാര്യയാണെന്ന തരത്തില് സമൂഹമാധ്യമങ്ങളില് വ്യാപകമായ നുണപ്രചാരണമാണ് നടക്കുന്നത്.
കോണ്ഗ്രസ്, ലീഗ് അനുകൂല ഹാന്ഡിലുകള് ചാനലുകളുടെ വ്യാജ കാര്ഡുകള് ഉപയോഗിച്ച് ഈ നുണ പ്രചരിപ്പിക്കുകയാണെന്ന് വസീഫ് ആരോപിച്ചു. നുണകള് കൊണ്ട് പൊതുബോധം സൃഷ്ടിക്കാനുള്ള ഇത്തരം നീചമായ രാഷ്ട്രീയ വേട്ടയാടലുകള്ക്കെതിരെ ശക്തമായി പ്രതികരിക്കുമെന്നും അദ്ദേഹം വ്യക്തമാക്കി. ഇത്തരം അധമമായ പ്രവൃത്തികള്ക്ക് മുന്നില് തങ്ങള് തോറ്റുകൊടുക്കില്ലെന്നും ഭയമില്ലാതെ രാഷ്ട്രീയ പോരാട്ടം തുടരുമെന്നും അദ്ദേഹം ഫേസ്ബുക്ക് കുറിപ്പിലൂടെ അറിയിച്ചു.
കേരളത്തില് കുറച്ചു കാലമായി ഇടതുപക്ഷ പ്രവര്ത്തകരെയും അവരുടെ കുടുംബാംഗങ്ങളെയും അപമാനിക്കുന്ന പ്രവണത വലതുപക്ഷ കേന്ദ്രങ്ങളില് നിന്ന് ഉണ്ടാകുന്നുണ്ടെന്നും വസീഫ് കുറ്റപ്പെടുത്തി. സംഭവത്തിന്റെ സത്യാവസ്ഥ മനസ്സിലാക്കാതെ വ്യക്തിഹത്യ ലക്ഷ്യമിട്ടുള്ള പ്രചാരണങ്ങള്ക്കെതിരെ നിയമപരമായ മാര്ഗങ്ങള് സ്വീകരിക്കുമെന്നും അദ്ദേഹം കൂട്ടിച്ചേര്ത്തു.
Photo and News Source: Janmabhumi
