ഇരട്ടകളുടെ ഗ്രാമമെന്നറിയപ്പെടുന്ന കൊടിഞ്ഞിയിൽ വീണ്ടുമൊരു അപൂർവ വിവാഹത്തിന് വേദിയൊരുങ്ങുന്നു. ഒരേ രൂപവും ഭാവവുമുള്ള ഇരട്ട സഹോദരന്മാരായ യൂസഫും മുഹമ്മദും, ഇരട്ട സഹോദരിമാരായ നദയെയും ഫിദയെയും വിവാഹം കഴിക്കാൻ ഒരുങ്ങുകയാണ്. കൊടിഞ്ഞി അക്ബർ ഓഡിറ്റോറിയത്തിൽ വെച്ച് നടക്കുന്ന ഈ വിവാഹം നാട്ടുകാർക്കും ബന്ധുക്കൾക്കും ഏറെ കൗതുകവും സന്തോഷവും പകരുന്നു.
നെച്ചിക്കാട്ട് ഇസ്മായിൽ-നസീമ ദമ്പതികളുടെ മക്കളാണ് വധുക്കളായ നദയും ഫിദയും. കോട്ടയ്ക്കൽ പറപ്പൂർ തൊട്ടിയിൽ അബ്ദുലത്തീഫ്-ഫാത്തിമ ദമ്പതികളുടെ മക്കളാണ് വരന്മാരായ യൂസഫും മുഹമ്മദും. ഫറോക്ക് കോളജിൽ ജിയോളജി പി.ജി വിദ്യാർഥിനികളാണ് നദയും ഫിദയും. വിദേശത്ത് ഡിജിറ്റൽ പ്രിന്റിങ് ബിസിനസ് നടത്തുന്നവരാണ് യൂസഫും മുഹമ്മദും. ബന്ധുക്കൾ വഴിയാണ് ഈ വിവാഹാലോചന നടന്നത്.
ലോകഭൂപടത്തിൽ തന്നെ ഇരട്ടകളുടെ ജനനനിരക്ക് കൊണ്ട് ശ്രദ്ധേയമായ ഗ്രാമമാണ് കൊടിഞ്ഞി. നാലായിരത്തോളം കുടുംബങ്ങളുള്ള ഈ ഗ്രാമത്തിൽ അഞ്ഞൂറോളം ജോഡി ഇരട്ടകളുണ്ട്. 2001-ലാണ് ഇവിടുത്തെ ഇരട്ടപ്പെരുമ പുറംലോകം അറിയുന്നത്. ശാസ്ത്രലോകത്തിന് ഇന്നും പിടികിട്ടാത്ത വിസ്മയമാണ് കൊടിഞ്ഞിയിലെ ഈ പ്രതിഭാസം. നാഷണൽ ജോഗ്രഫി ഉൾപ്പെടെയുള്ള അന്താരാഷ്ട്ര മാധ്യമങ്ങൾ ഇവിടെ ഡോക്യുമെന്ററികൾ തയ്യാറാക്കിയിട്ടുണ്ട്.
ഇരട്ടകളുടെ ക്ഷേമത്തിനായി 'ട്വിൻസ് ആൻഡ് ക്വിൻസ് അസോസിയേഷൻ' (ടാക്ക) എന്ന പേരിൽ പ്രത്യേക സംഘടനയും ഇവിടെ പ്രവർത്തിക്കുന്നുണ്ട്. ശാസ്ത്രജ്ഞർ പലതവണ പഠനങ്ങൾ നടത്തിയിട്ടും ഈ ഇരട്ട രഹസ്യത്തിന്റെ യഥാർത്ഥ കാരണം കണ്ടെത്താൻ ഇന്നും സാധിച്ചിട്ടില്ല. ഇരട്ടകൾ ഇരട്ടകളെ വിവാഹം കഴിക്കുന്നതും, ഒരേസമയം ഗർഭം ധരിക്കുന്നതും പ്രസവിക്കുന്നതുമെല്ലാം കൊടിഞ്ഞി നിവാസികൾക്ക് പുത്തരിയല്ലെങ്കിലും, ഇത്തവണത്തെ ഈ വിവാഹം ഏറെ ശ്രദ്ധിക്കപ്പെടുകയാണ്.
Photo and News Source: Suprabhaatham
