അബുദാബിയിലെ പ്രമുഖ വ്യവസായി എം.എ. യൂസഫലിയുടെ മകളും റിസ്ക് ആർട്ട് ഇനിഷ്യേറ്റീവ് എക്സിക്യൂട്ടീവ് ഡയറക്ടറുമായ ഷഫീന യൂസഫലി തന്റെ ജീവിതത്തിലെ വ്യത്യസ്തമായ ഏടുകൾ പങ്കുവെക്കുന്നു. ഖലീജ് ടൈംസിന്റെ 'ഗ്ലോബൽ ഇൻഡ്യൻസ് ഓഫ് ദി യുഎഇ' എന്ന വോഡ്കാസ്റ്റ് പരമ്പരയിലാണ് അവർ ബിസിനസ്സ് ലോകത്തുനിന്നും കലയുടെ ലോകത്തേക്കുള്ള തന്റെ മാറ്റത്തെക്കുറിച്ച് മനസ്സ് തുറന്നത്.
ഭക്ഷണ-പാനീയ മേഖലയിലെ വിജയകരമായ കരിയറിന് ശേഷം, അധികമാരും ശ്രദ്ധിക്കപ്പെടാത്ത കലാകാരന്മാർക്ക് ആഗോളതലത്തിൽ വേദി ഒരുക്കുന്നതിലാണ് ഷഫീന ഇപ്പോൾ ശ്രദ്ധ കേന്ദ്രീകരിക്കുന്നത്. ബിസിനസ്സിൽ വ്യക്തിഗത നേട്ടങ്ങൾക്കാണ് മുൻതൂക്കമെങ്കിൽ, കലയുടെ ലോകത്ത് കലാകാരന്മാരുടെ വിജയമാണ് ഏറ്റവും പ്രധാനമെന്ന് അവർ ചൂണ്ടിക്കാട്ടി. "സാധാരണ ബിസിനസ്സുകളിൽ നിങ്ങളാണ് ഏറ്റവും പ്രധാനപ്പെട്ട വ്യക്തി. എന്നാൽ കലയിലേക്ക് വരുമ്പോൾ നമ്മൾ രണ്ടാമതാകുന്നു. കലാകാരന്മാരുടെ വിജയത്തിലാണ് നമ്മൾ സന്തോഷം കണ്ടെത്തുന്നത്," ഷഫീന വ്യക്തമാക്കി.
മാതൃത്വത്തെക്കുറിച്ചും കുട്ടികളെ വളർത്തുന്നതിനെക്കുറിച്ചും ഷഫീന തന്റെ കാഴ്ചപ്പാടുകൾ പങ്കുവെച്ചു. മാതാപിതാക്കൾ കുട്ടികൾക്ക് ഒരു തടസ്സമായി മാറാതെ, അവർക്ക് ശരിയായ വഴികാട്ടിയായി മാറണമെന്നാണ് തന്റെ നിലപാടെന്ന് അവർ ഓർമ്മിപ്പിച്ചു. അബുദാബിയെ കലാകാരന്മാർക്ക് മികച്ചൊരു അഭയകേന്ദ്രമാക്കി മാറ്റുക എന്നതാണ് തന്റെ പ്രധാന ലക്ഷ്യമെന്നും അവർ കൂട്ടിച്ചേർത്തു.
യുഎഇയിൽ നിന്ന് ആഗോളതലത്തിൽ സ്വാധീനം ചെലുത്തുന്ന ഇന്ത്യൻ നേതാക്കളെ പരിചയപ്പെടുത്തുന്ന 'ഗ്ലോബൽ ഇൻഡ്യൻസ് ഓഫ് ദി യുഎഇ' എന്ന പരിപാടിയുടെ 'വിമൻ ഓൺ ദി റൈസ്' എന്ന വിഭാഗത്തിലാണ് ഷഫീനയുടെ അഭിമുഖം ഉൾപ്പെടുത്തിയിരിക്കുന്നത്. കലയിലൂടെ ജീവിതത്തിന് പുതിയ അർത്ഥം കണ്ടെത്തുന്നതിനെക്കുറിച്ചുള്ള അവരുടെ വാക്കുകൾ പലർക്കും പ്രചോദനമാണ്.
Photo and News Source: Suprabhaatham
