രണ്ട് ദിവസത്തെ ചൈനീസ് സന്ദർശനം പൂർത്തിയാക്കി യുഎസ് പ്രസിഡൻ്റ് ഡോണാൾഡ് ട്രംപ് മടങ്ങി. ബെയ്ജിങ്ങിലെ ഔദ്യോഗിക സന്ദർശനത്തിന് ശേഷം ട്രംപിൻ്റെ ക്ഷണപ്രകാരം ചൈനീസ് പ്രസിഡൻ്റ് ഷി ജിൻപിങ് അമേരിക്ക സന്ദർശിക്കാൻ തീരുമാനിച്ചു. സെപ്റ്റംബർ 24-ന് ഷി ജിൻപിങ് വൈറ്റ് ഹൗസിൽ എത്തുമെന്ന് ചൈനീസ് വിദേശകാര്യ മന്ത്രി വാങ് യി ഔദ്യോഗികമായി സ്ഥിരീകരിച്ചു.
ട്രംപിൻ്റെ സന്ദർശന വേളയിൽ ഇരുരാജ്യങ്ങളും തമ്മിൽ നിർണ്ണായകമായ വ്യാപാര കരാറുകളിൽ ധാരണയായതായി സൂചനയുണ്ട്. എന്നാൽ, കരാറുകളെക്കുറിച്ചുള്ള കൂടുതൽ വിശദാംശങ്ങൾ ഇതുവരെ പുറത്തുവിട്ടിട്ടില്ല. കൃഷി, ഏവിയേഷൻ, ഇലക്ട്രിക് വാഹനങ്ങൾ, ആർട്ടിഫിഷ്യൽ ഇൻ്റലിജൻസ് തുടങ്ങിയ മേഖലകളിലെ പ്രമുഖ കമ്പനി മേധാവികളും ട്രംപിനൊപ്പം ബെയ്ജിങ്ങിൽ എത്തിയിരുന്നു.
ഇറാനുമായുള്ള സംഘർഷാവസ്ഥയും ഹോർമുസ് കടലിടുക്കുമായി ബന്ധപ്പെട്ട വിഷയങ്ങളും ചർച്ചകളിൽ ഇടംപിടിച്ചു. ഹോർമുസ് കടലിടുക്ക് തുറന്നുനൽകുന്ന കാര്യത്തിൽ ചൈനയുടെ പിന്തുണ ലഭിക്കുമെന്ന കാര്യത്തിൽ ട്രംപ് ശുഭാപ്തിവിശ്വാസം പ്രകടിപ്പിച്ചു. വ്യാപാര ബന്ധങ്ങൾ ശക്തിപ്പെടുത്തുന്നതിനാണ് കൂടിക്കാഴ്ചയിൽ മുൻഗണന നൽകിയതെന്ന് റിപ്പോർട്ടുകൾ വ്യക്തമാക്കുന്നു.
തൻ്റെ ചൈനീസ് സന്ദർശനം വളരെ വിജയകരമായിരുന്നുവെന്ന് ട്രംപ് പ്രതികരിച്ചു. യുഎസ് പ്രസിഡൻ്റിൻ്റെ സന്ദർശനം ചരിത്രപരവും ഇരുരാജ്യങ്ങളുടെയും ബന്ധത്തിൽ ഒരു നാഴികക്കല്ലുമാണെന്ന് ഷി ജിൻപിങ് വിശേഷിപ്പിച്ചു. ഉഭയകക്ഷി ബന്ധം കൂടുതൽ ദൃഢമാക്കാൻ ഈ കൂടിക്കാഴ്ച സഹായിക്കുമെന്നാണ് വിലയിരുത്തൽ.
Photo and News Source: Sathyam Online
