ഇറാൻ-ഇസ്രായേൽ സംഘർഷം പശ്ചാത്തലത്തിൽ ഗൾഫ് രാജ്യങ്ങളിലെ സിനിമാ റിലീസുകൾ അനിശ്ചിതത്വത്തിലായിരിക്കുകയാണ്. ജി.സി.സി രാജ്യങ്ങളിലെ റിലീസ് തടസ്സപ്പെട്ടാൽ അത് മലയാള സിനിമകളുടെ കളക്ഷനെ വലിയ രീതിയിൽ ബാധിക്കുമെന്ന ആശങ്കയിലാണ് നിർമ്മാതാക്കൾ. നിലവിലെ സാഹചര്യത്തിൽ സിനിമാ മേഖല കടുത്ത വെല്ലുവിളിയാണ് നേരിട്ടുകൊണ്ടിരിക്കുന്നത്.
മാർച്ച് 19-ന് റിലീസ് നിശ്ചയിച്ചിരിക്കുന്ന 'ധുരന്ദർ', 'ടോക്സിക്', ജയസൂര്യ നായകനാകുന്ന 'ആട് 3' എന്നീ ചിത്രങ്ങൾ വലിയ പ്രതീക്ഷയോടെയാണ് കാത്തിരിക്കുന്നത്. ഇതിൽ 'ധുരന്ദർ' എന്ന ചിത്രത്തിന്റെ ആദ്യ ഭാഗത്തിന് പാകിസ്ഥാൻ വിരുദ്ധ പരാമർശങ്ങളുടെ പേരിൽ നേരത്തെ ഗൾഫ് രാജ്യങ്ങളിൽ വിലക്ക് ഏർപ്പെടുത്തിയിരുന്നു. രണ്ടാം ഭാഗത്തിന് നിലവിൽ വിലക്കില്ലെങ്കിലും, സംഘർഷാവസ്ഥ കണക്കിലെടുത്ത് റിലീസ് സാധ്യമാകുമോ എന്ന കാര്യത്തിൽ അനിശ്ചിതത്വം തുടരുന്നു. വിലക്ക് തുടരുകയാണെങ്കിൽ ഗൾഫ് ഒഴികെയുള്ള വിപണികളിൽ മാത്രം ചിത്രം റിലീസ് ചെയ്യാനാണ് അണിയറപ്രവർത്തകരുടെ തീരുമാനം.
ഏപ്രിൽ, മെയ് മാസങ്ങളിൽ റിലീസ് ചെയ്യാനിരിക്കുന്ന വമ്പൻ മലയാള ചിത്രങ്ങളും സമാനമായ പ്രതിസന്ധി നേരിടുന്നുണ്ട്. നിവിൻ പോളിയുടെ 'പ്രതിഛായ', മമ്മൂട്ടി-മോഹൻലാൽ ചിത്രം 'പേട്രിയറ്റ്', മോഹൻലാലിന്റെ 'ദൃശ്യം 3', ടൊവിനോ തോമസ് നായകനാകുന്ന 'പള്ളിചട്ടമ്പി', ജോജു ജോർജ് ചിത്രം 'വരവ്' തുടങ്ങിയ ബ്രഹ്മാണ്ഡ ചിത്രങ്ങളുടെ റിലീസിനെയാണ് ഇത് ബാധിക്കുക. ജി.സി.സി വിപണിയിലെ റിലീസ് മാറ്റിവെക്കേണ്ടി വന്നാൽ അത് നിർമ്മാതാക്കൾക്ക് വലിയ സാമ്പത്തിക നഷ്ടമുണ്ടാക്കും.
Photo and News Source: Kerala Kaumudi Latest
