കൊല്ലം ജില്ലയിൽ കനത്ത ചൂട് നേരിടുന്നതിനെത്തുടർന്ന് നാളെ എല്ലാ വിദ്യാഭ്യാസ സ്ഥാപനങ്ങൾക്കും അവധി പ്രഖ്യാപിച്ചു. പൊതുപരീക്ഷകളും അഭിമുഖങ്ങളും ഈ അവധിയിൽ ഉൾപ്പെടില്ല. സംസ്ഥാനത്ത് ഉഷ്ണതരംഗ സാധ്യതയെക്കുറിച്ച് കേന്ദ്ര കാലാവസ്ഥ വകുപ്പ് മുന്നറിയിപ്പ് നൽകി. കൊല്ലം, തൃശൂർ, പാലക്കാട് ജില്ലകളിലെ ഒറ്റപ്പെട്ട പ്രദേശങ്ങളിൽ ഇന്നും നാളെയും ഉഷ്ണതരംഗത്തിന് സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. ഈ മൂന്ന് ജില്ലകളിൽ ഓറഞ്ച് അലർട്ട് പ്രഖ്യാപിച്ചു.
പാലക്കാട്ടിൽ 41 ഡിഗ്രി സെൽഷ്യസ് വരെ താപനില ഉയരുമെന്നും കൊല്ലത്തും തൃശൂരിലും 40 ഡിഗ്രി സെൽഷ്യസ് വരെ രേഖപ്പെടുത്തുമെന്നും പ്രവചിക്കുന്നു. കോട്ടയം, പത്തനംതിട്ട, എറണാകുളം, കോഴിക്കോട് ജില്ലകളിൽ 38 ഡിഗ്രിയും ആലപ്പുഴ, മലപ്പുറം, കണ്ണൂർ, കാസർകോട് ജില്ലകളിൽ 37 ഡിഗ്രിയും തിരുവനന്തപുരത്ത് 36 ഡിഗ്രിയും താപനില രേഖപ്പെടുത്തുമെന്ന് കാലാവസ്ഥാ വകുപ്പ് അറിയിച്ചു. സാധാരണയേക്കാൾ 4-5 ഡിഗ്രി വരെ താപനില ഉയരാനുള്ള സാധ്യതയെത്തുടർന്ന് ജാഗ്രത പാലിക്കണമെന്ന് വകുപ്പ് ആവശ്യപ്പെട്ടു.
Photo and News Source: Sathyam Online
