മലയാളികളുടെ പ്രിയ ഗായകൻ എംജി ശ്രീകുമാർ തന്റെ ഗരാജിലേക്ക് പുതിയൊരു അതിഥിയെ കൂടി സ്വാഗതം ചെയ്തിരിക്കുകയാണ്. ഭാര്യ ലേഖയ്ക്കൊപ്പമെത്തിയാണ് അദ്ദേഹം ഈ ആഡംബര വാഹനം സ്വന്തമാക്കിയത്. മഞ്ചേരിയിലെ എച്ച്എം മോട്ടോഴ്സ് എന്ന സെക്കൻഡ് ഹാൻഡ് കാർ ഡീലർഷിപ്പിൽ നിന്നാണ് അദ്ദേഹം ഈ മിനി കൂപ്പർ ഹാച്ച്ബാക്ക് വാങ്ങിയിരിക്കുന്നത്.
ചിത്രങ്ങളിൽ നിന്ന് വ്യക്തമാകുന്നത് പ്രകാരം, 2014 മുതൽ 2018 വരെ വിപണിയിലുണ്ടായിരുന്ന മൂന്നാം തലമുറ മിനി കൂപ്പറിന്റെ ത്രീ-ഡോർ മോഡലാണ് ഗായകൻ തിരഞ്ഞെടുത്തിരിക്കുന്നത്. സ്റ്റൈലിഷ് ലുക്കും മികച്ച ഡ്രൈവിംഗ് അനുഭവവും നൽകുന്ന ഈ വാഹനം വാഹനപ്രേമികൾക്കിടയിൽ ഏറെ പ്രശസ്തമാണ്.
ഈ മോഡലിൽ 1.5 ലിറ്റർ ഡീസൽ, 2.0 ലിറ്റർ പെട്രോൾ എന്നിങ്ങനെ രണ്ട് എഞ്ചിൻ ഓപ്ഷനുകൾ ലഭ്യമായിരുന്നു. പെട്രോൾ പതിപ്പ് 189 bhp കരുത്തും 280 Nm ടോർക്കും ഉത്പാദിപ്പിക്കാൻ ശേഷിയുള്ളതാണ്. മികച്ച പെർഫോമൻസിനൊപ്പം എൽഇഡി ഹെഡ്ലൈറ്റുകൾ, ഓട്ടോമാറ്റിക് ക്ലൈമറ്റ് കൺട്രോൾ, ബിഎംഡബ്ല്യുവിന്റെ ഇൻഫോടെയ്ൻമെന്റ് സിസ്റ്റം തുടങ്ങിയ ആധുനിക സൗകര്യങ്ങളും ഈ വാഹനത്തിലുണ്ട്.
സുരക്ഷയുടെ കാര്യത്തിലും മിനി കൂപ്പർ ഒട്ടും പിന്നിലല്ല. എബിഎസ്, ബ്രേക്ക് അസിസ്റ്റ്, ഇലക്ട്രോണിക് സ്റ്റെബിലിറ്റി പ്രോഗ്രാം (ESP), ഒന്നിലധികം എയർബാഗുകൾ തുടങ്ങിയ സുരക്ഷാ സംവിധാനങ്ങൾ ഈ വാഹനത്തിൽ ഉൾപ്പെടുത്തിയിട്ടുണ്ട്. സോഷ്യൽ മീഡിയയിൽ സജീവമായ എംജി ശ്രീകുമാർ പങ്കുവെക്കുന്ന വിശേഷങ്ങൾ ആരാധകർ എപ്പോഴും വലിയ ആവേശത്തോടെയാണ് സ്വീകരിക്കാറുള്ളത്.
Photo and News Source: DriveSpark
