നിയുക്ത മുഖ്യമന്ത്രി വി.ഡി. സതീശന്റെ ഔദ്യോഗിക ജീവിതത്തിലും രാഷ്ട്രീയ യാത്രയിലും കഴിഞ്ഞ കാൽനൂറ്റാണ്ടായി നിഴലായി കൂടെയുള്ളവരാണ് വി.കെ. കമറുദ്ദീനും ഇ.എൻ. ഷാജഹാനും. പറവൂർ വാണിയക്കാട് വലിയപറമ്പിൽ സ്വദേശിയായ കമറുദ്ദീൻ 2001-ൽ വി.ഡി. സതീശൻ ആദ്യമായി തിരഞ്ഞെടുക്കപ്പെട്ട കാലം മുതൽ അദ്ദേഹത്തിന്റെ ഓഫീസ് സ്റ്റാഫായി പ്രവർത്തിക്കുന്നു. കോൺഗ്രസ് പ്രവർത്തകനായിരുന്ന കമറുദ്ദീൻ അന്നു മുതൽ സതീശന്റെ പ്രവർത്തനങ്ങളുടെ അവിഭാജ്യ ഘടകമാണ്.
കരുമാല്ലൂർ മാളികംപീടിക ഏറാട്ടുപടി സ്വദേശിയായ ഷാജഹാൻ (ഷാജി) 2001-ലെ തിരഞ്ഞെടുപ്പ് പ്രചാരണ വേളയിലാണ് ഡ്രൈവറായി എത്തുന്നത്. അന്നത്തെ ഡ്രൈവറായിരുന്ന ഫൈസലിന്റെ നിർദ്ദേശപ്രകാരമാണ് ഷാജി സതീശന്റെ ടീമിലെത്തിയത്. 2002-ൽ ഫൈസൽ വിദേശത്തേക്ക് പോയതോടെ ഷാജി സ്ഥിരം ഡ്രൈവറായി ചുമതലയേറ്റു. സതീശൻ പ്രതിപക്ഷ നേതാവായപ്പോഴും ഇരുവരും അദ്ദേഹത്തിന്റെ പേഴ്സണൽ സ്റ്റാഫിലും ഡ്രൈവർ സ്ഥാനത്തുമായി വിശ്വസ്തതയോടെ തുടർന്നു.
ഇവർക്ക് പുറമെ, 2011-ൽ പൊതുമരാമത്ത് വകുപ്പിൽ നിന്ന് ഡെപ്യൂട്ടേഷനിൽ എം.ബി. സുരേഷ് ബാബുവും സതീശന്റെ ഓഫീസിലെത്തിയിരുന്നു. 2013-ൽ അദ്ദേഹം തിരികെ പോയെങ്കിലും, സതീശൻ പ്രതിപക്ഷ നേതാവായപ്പോൾ വീണ്ടും അദ്ദേഹത്തിന്റെ സ്റ്റാഫിലേക്ക് മടങ്ങിയെത്തി. തുടർന്ന് ഫോറസ്റ്റ് ഡിപ്പാർട്ട്മെന്റിൽ നിന്ന് ടി.ജി. ജോസഫും ഓഫീസ് സെക്രട്ടറിയായി ചുമതലയേറ്റിരുന്നു. ഇവർ രണ്ടുപേരും ഔദ്യോഗിക സർവീസിൽ നിന്ന് വിരമിച്ചെങ്കിലും, കമറുദ്ദീനും ഷാജിയും ഇന്നും സതീശന്റെ വിശ്വസ്തരായ സഹായികളായി തുടരുന്നു.
Photo and News Source: Kerala Kaumudi Latest
