തിരുവനന്തപുരം കിംസ്ഹെൽത്ത് ആശുപത്രിയിൽ 53 വയസ്സുകാരനായ കൊല്ലം സ്വദേശിക്ക് സങ്കീർണ്ണമായ കീഹോൾ ബൈപ്പാസ് ശസ്ത്രക്രിയ വിജയകരമായി പൂർത്തിയാക്കി. കഠിനമായ നെഞ്ചുവേദനയും ശ്വാസംമുട്ടലും അനുഭവപ്പെട്ടതിനെത്തുടർന്നാണ് ഇദ്ദേഹത്തെ ആശുപത്രിയിലെ അത്യാഹിത വിഭാഗത്തിൽ പ്രവേശിപ്പിച്ചത്. തുടർന്ന് നടത്തിയ ആൻജിയോഗ്രാം പരിശോധനയിൽ ഹൃദയത്തിലേക്കുള്ള പ്രധാന ധമനികളിൽ ഗുരുതരമായ തടസ്സങ്ങൾ കണ്ടെത്തുകയായിരുന്നു.
രോഗിയുടെ ആരോഗ്യസ്ഥിതിയും വേഗത്തിൽ സാധാരണ ജീവിതത്തിലേക്ക് മടങ്ങാനുള്ള അദ്ദേഹത്തിന്റെ താൽപ്പര്യവും പരിഗണിച്ച്, പരമ്പരാഗത ശസ്ത്രക്രിയയ്ക്ക് പകരം മിനിമലി ഇൻവേസീവ് കീഹോൾ ബൈപ്പാസ് ശസ്ത്രക്രിയ തിരഞ്ഞെടുക്കുകയായിരുന്നു. നെഞ്ചിന്റെ മുൻഭാഗത്തെ അസ്ഥി മുറിക്കാതെ, വശങ്ങളിലൂടെ ചെറിയ മുറിവുകൾ മാത്രം ഉണ്ടാക്കിയാണ് ഈ ശസ്ത്രക്രിയ നടത്തിയത്. സാധാരണയായി കീഹോൾ ശസ്ത്രക്രിയയിൽ വലതുവശത്തെ ധമനിയിലെ തടസ്സങ്ങൾ നീക്കുന്നത് ഏറെ വെല്ലുവിളിയാണ്, എന്നാൽ ഈ ശസ്ത്രക്രിയയിൽ ഇടത് ധമനിയിലെ രണ്ട് തടസ്സങ്ങളും വലത് ധമനിയിലെ ഒരു തടസ്സവും വിജയകരമായി പരിഹരിക്കാൻ ഡോക്ടർമാർക്ക് സാധിച്ചു.
ഈ ശസ്ത്രക്രിയയുടെ മറ്റൊരു പ്രധാന പ്രത്യേകത, ഹാർട്ട് ലങ് മെഷീന്റെ സഹായമില്ലാതെ ഹൃദയമിടിപ്പ് നിലനിർത്തിക്കൊണ്ടുതന്നെ ഇത് പൂർത്തിയാക്കി എന്നതാണ്. ഒമ്പത് മണിക്കൂർ നീണ്ടുനിന്ന ഈ ശസ്ത്രക്രിയ, അത്യാധുനിക സാങ്കേതികവിദ്യയുടെയും വിദഗ്ധരായ ഡോക്ടർമാരുടെയും സഹായത്തോടെ ഹൃദയത്തിലെ ഏത് പ്രധാന തടസ്സങ്ങളും കീഹോൾ ശസ്ത്രക്രിയയിലൂടെ പരിഹരിക്കാമെന്ന് തെളിയിക്കുന്നതാണെന്ന് കാർഡിയോതൊറാസിക് ആൻഡ് വാസ്കുലർ സർജറി വിഭാഗം കൺസൾട്ടന്റ് ഡോ. അതുൽ എബ്രഹാം വ്യക്തമാക്കി.
ഡോ. അതുൽ എബ്രഹാമിന് പുറമെ ഡോ. ദിനേഷ് ഡേവിഡ്, ഡോ. വിപിൻ ബി. നായർ, ഡോ. സുഭാഷ് എസ്., ഡോ. ഹരി ദേവ് ജെ.ജെ. എന്നിവരടങ്ങുന്ന വിദഗ്ധ സംഘമാണ് ചികിത്സയ്ക്ക് നേതൃത്വം നൽകിയത്. ആശുപത്രിയിൽ ഒരാഴ്ചത്തെ ചികിത്സയ്ക്ക് ശേഷം പൂർണ്ണ ആരോഗ്യവാനായി മടങ്ങിയ രോഗി, മൂന്നാഴ്ചയ്ക്കുള്ളിൽ തന്നെ തന്റെ സാധാരണ ജീവിതത്തിലേക്ക് മടങ്ങിയെത്തി.
Photo and News Source: Kerala Kaumudi Latest
