തെരഞ്ഞെടുപ്പ് കമ്മീഷൻ എസ്ഐആർ (SIR) മൂന്നാം ഘട്ട പ്രവർത്തനങ്ങൾ ഔദ്യോഗികമായി പ്രഖ്യാപിച്ചു. രാജ്യത്തെ 16 സംസ്ഥാനങ്ങളിലും മൂന്ന് കേന്ദ്രഭരണ പ്രദേശങ്ങളിലുമായാണ് ഈ ഘട്ടം നടപ്പിലാക്കുന്നത്. വോട്ടർ പട്ടികയുടെ കൃത്യത ഉറപ്പാക്കുന്നതിനും അർഹരായ മുഴുവൻ പൗരന്മാരെയും ഉൾപ്പെടുത്തുന്നതിനുമാണ് ഈ നടപടി ലക്ഷ്യമിടുന്നത്.
സെൻസസ് വിവരങ്ങളും കാലാവസ്ഥാ സാഹചര്യങ്ങളും പരിഗണിച്ച് ഹിമാചൽ പ്രദേശ്, ലഡാക്ക്, ജമ്മു കശ്മീർ എന്നിവിടങ്ങളിൽ എസ്ഐആർ നടപടികൾ പിന്നീട് പ്രഖ്യാപിക്കുമെന്ന് കമ്മീഷൻ വ്യക്തമാക്കി. ഈ പ്രക്രിയയുടെ ഭാഗമായി 3.94 ലക്ഷം ബൂത്ത് ലെവൽ ഓഫീസർമാർ (BLO) നേരിട്ട് വീടുകൾ സന്ദർശിച്ച് വിവരശേഖരണം നടത്തും. ഏകദേശം 36.73 കോടി വോട്ടർമാരെയാണ് ഇവർ നേരിൽ കാണുക.
രാഷ്ട്രീയ പാർട്ടികൾ നിയമിക്കുന്ന 3.42 ലക്ഷം ബൂത്ത് ലെവൽ ഏജന്റുമാരുടെ സഹായവും ഈ ദൗത്യത്തിൽ ലഭ്യമാകും. സെൻസസ് നടപടികൾക്കൊപ്പം തന്നെയാണ് എസ്ഐആർ പ്രവർത്തനങ്ങളും നടപ്പിലാക്കുന്നത്. അർഹരായ എല്ലാ വോട്ടർമാരെയും പട്ടികയിൽ ഉൾപ്പെടുത്തുന്നതിനൊപ്പം, മരണപ്പെട്ടവരുടെയും താമസം മാറിയവരുടെയും പേരുകൾ പട്ടികയിൽ നിന്ന് നീക്കം ചെയ്യാനും കമ്മീഷൻ നടപടി സ്വീകരിക്കും.
Photo and News Source: Janmabhumi
