വേനൽക്കാലത്ത് ദാഹമകറ്റാൻ ഏറെപ്പേർ ആശ്രയിക്കുന്ന തണ്ണിമത്തൻ അശ്രദ്ധമായി കൈകാര്യം ചെയ്താൽ വലിയ അപകടങ്ങൾക്ക് കാരണമാകുമെന്ന് ഛത്തീസ്ഗഡിലെ ദാരുണമായ സംഭവം ഓർമ്മിപ്പിക്കുന്നു. ജഞ്ജഗിർ ജില്ലയിൽ മുറിച്ചുവെച്ച തണ്ണിമത്തൻ കഴിച്ചതിനെത്തുടർന്ന് 15 വയസുകാരൻ മരണപ്പെടുകയും മൂന്ന് കുട്ടികൾക്ക് ഭക്ഷ്യവിഷബാധയേൽക്കുകയും ചെയ്ത വാർത്ത വലിയ ആശങ്കയാണ് ഉയർത്തുന്നത്. രാവിലെ മുറിച്ചുവെച്ച തണ്ണിമത്തൻ വൈകുന്നേരം കഴിച്ചതാണ് കുട്ടികൾക്ക് വിനയായത്.
ഭക്ഷ്യവിഷബാധയും ബാക്ടീരിയ ബാധയുമാണ് മരണകാരണമെന്ന് ഡോക്ടർമാർ സ്ഥിരീകരിച്ചു. മുറിച്ച തണ്ണിമത്തൻ സാധാരണ താപനിലയിൽ പരമാവധി രണ്ട് മണിക്കൂർ മാത്രമേ സുരക്ഷിതമായിരിക്കുകയുള്ളൂ. ചൂടുള്ള കാലാവസ്ഥയാണെങ്കിൽ ഇത് ഒരു മണിക്കൂറായി കുറയുന്നു. മുറിച്ച തണ്ണിമത്തൻ പുറത്തുവെച്ച ശേഷം പിന്നീട് ഫ്രിഡ്ജിലേക്ക് മാറ്റുന്നത് ബാക്ടീരിയകളുടെ വളർച്ചയെ വേഗത്തിലാക്കുമെന്നും വിദഗ്ധർ മുന്നറിയിപ്പ് നൽകുന്നു.
മുറിച്ച തണ്ണിമത്തൻ വായു കടക്കാത്ത പാത്രങ്ങളിൽ (Air-tight containers) സൂക്ഷിച്ചാൽ ഫ്രിഡ്ജിൽ മൂന്ന് മുതൽ അഞ്ച് ദിവസം വരെ കേടുകൂടാതെയിരിക്കും. എന്നാൽ, തണ്ണിമത്തൻ മുറിക്കുന്നതിന് മുൻപ് പുറംതോട് നന്നായി കഴുകാനും, ഉപയോഗിക്കുന്ന കത്തിയും കട്ടിംഗ് ബോർഡും വൃത്തിയായി സൂക്ഷിക്കാനും പ്രത്യേകം ശ്രദ്ധിക്കണം. പഴത്തിന് പുളിച്ച മണമോ, രുചിമാറ്റമോ, വഴുവഴുപ്പുള്ള ഘടനയോ അനുഭവപ്പെട്ടാൽ അത് കഴിക്കാൻ പാടില്ല.
വേനൽക്കാലത്ത് മുറിച്ചുവെച്ച പഴങ്ങൾ പെട്ടെന്ന് കേടാകാൻ സാധ്യതയുള്ളതിനാൽ, പുറത്തുനിന്നും മുറിച്ചുവെച്ച പഴങ്ങൾ വാങ്ങുന്നത് ഒഴിവാക്കുന്നതാണ് ഉചിതം. ആരോഗ്യസുരക്ഷ മുൻനിർത്തി ഇത്തരം കാര്യങ്ങളിൽ അതീവ ജാഗ്രത പുലർത്തണമെന്ന് ആരോഗ്യവിദഗ്ധർ നിർദ്ദേശിക്കുന്നു.
Photo and News Source: Kerala Kaumudi Latest
