രാജ്യത്തെ പഞ്ചസാരയുടെ ലഭ്യത ഉറപ്പാക്കുന്നതിനും വിലക്കയറ്റം തടയുന്നതിനുമായി പഞ്ചസാര കയറ്റുമതിക്ക് കേന്ദ്രസർക്കാർ നിരോധനം ഏർപ്പെടുത്തി. കേന്ദ്ര വാണിജ്യ-വ്യവസായ മന്ത്രാലയത്തിന് കീഴിലുള്ള ഡയറക്ടറേറ്റ് ജനറൽ ഓഫ് ഫോറിൻ ട്രേഡ് ആണ് ഇതുസംബന്ധിച്ച ഉത്തരവ് പുറപ്പെടുവിച്ചത്. അസംസ്കൃത പഞ്ചസാര, വെളുത്ത പഞ്ചസാര, ശുദ്ധീകരിച്ച പഞ്ചസാര എന്നിവയുടെ കയറ്റുമതിക്കാണ് ഈ നിയന്ത്രണം ബാധകമാകുന്നത്. സെപ്റ്റംബർ 30 വരെയാണ് നിലവിൽ നിരോധനം ഏർപ്പെടുത്തിയിരിക്കുന്നത്.
മെയ് 13-ന് മുൻപായി കപ്പലുകളിൽ ചരക്ക് കയറ്റിത്തുടങ്ങിയതോ കസ്റ്റംസ് അധികാരികൾക്ക് മുൻപിൽ രേഖകൾ സമർപ്പിച്ചതോ ആയ കയറ്റുമതികൾക്ക് ഈ നിരോധനം ബാധകമല്ല. അതേസമയം, മറ്റ് രാജ്യങ്ങളുടെ ഭക്ഷ്യസുരക്ഷാ ആവശ്യങ്ങൾ പരിഗണിച്ച്, അതാത് സർക്കാരുകളുടെ പ്രത്യേക അഭ്യർത്ഥന പ്രകാരം ഇന്ത്യൻ സർക്കാർ അനുമതി നൽകിയാൽ കയറ്റുമതി തുടരാൻ സാധിക്കും. നിലവിൽ നിയന്ത്രിത വിഭാഗത്തിലുണ്ടായിരുന്ന കയറ്റുമതി നയത്തെയാണ് സർക്കാർ നിരോധിത വിഭാഗത്തിലേക്ക് മാറ്റിയത്.
ആഭ്യന്തര വിപണിയിലെ കരുതൽ ശേഖരം കുറയുമെന്ന ആശങ്കയാണ് ഇത്തരമൊരു കടുത്ത തീരുമാനത്തിലേക്ക് സർക്കാരിനെ നയിച്ചത്. 2025-26 സീസണിൽ ഇന്ത്യയിൽ ഏകദേശം 275 ലക്ഷം ടൺ പഞ്ചസാര ഉൽപ്പാദനം മാത്രമാണ് പ്രതീക്ഷിക്കുന്നത്. ആഭ്യന്തര ഉപഭോഗം 280 ലക്ഷം ടൺ വരെ എത്തുമെന്നാണ് കണക്കാക്കപ്പെടുന്നത്. സീസൺ അവസാനിക്കുമ്പോൾ കരുതൽ ശേഖരം 45 ലക്ഷം ടണ്ണായി കുറയാൻ സാധ്യതയുണ്ട്, ഇത് 2016-17-ന് ശേഷമുള്ള ഏറ്റവും താഴ്ന്ന നിരക്കാണ്.
എൽനിനോ പ്രതിഭാസം മൂലം അടുത്ത വർഷം മഴ കുറയാനുള്ള സാധ്യതയും, പശ്ചിമേഷ്യൻ പ്രതിസന്ധി കാരണം രാസവളങ്ങളുടെ ലഭ്യതയിൽ ഉണ്ടാകാൻ സാധ്യതയുള്ള കുറവും പഞ്ചസാര ഉൽപ്പാദനത്തെ പ്രതികൂലമായി ബാധിക്കുമെന്ന് സർക്കാർ വിലയിരുത്തുന്നു. ഈ സാഹചര്യത്തിൽ രാജ്യത്തെ പഞ്ചസാര ലഭ്യത സുരക്ഷിതമാക്കാനാണ് സർക്കാർ മുൻകരുതൽ നടപടികൾ സ്വീകരിച്ചിരിക്കുന്നത്.
Photo and News Source: Kerala Kaumudi
