എഞ്ചിനീയറിംഗ് ബിരുദവും മികച്ച ജോലിയും ഉപേക്ഷിച്ച് സിനിമയിലേക്ക് എത്തിയ ബേസിൽ ജോസഫ് ഇന്ന് മലയാള സിനിമയിലെ ഒഴിച്ചുകൂടാനാവാത്ത സാന്നിധ്യമാണ്. ഒരു വൈദികന്റെ മകനായി വളർന്ന തന്റെ ബാല്യകാലത്തെക്കുറിച്ചും, അന്ന് അനുഭവിച്ചിരുന്ന നിയന്ത്രണങ്ങളെക്കുറിച്ചും ബേസിൽ മനസ്സ് തുറക്കുന്നു. പള്ളീലച്ചന്റെ മകൻ എന്ന നിലയിൽ സ്കൂൾ കാലത്ത് എല്ലായ്പ്പോഴും ഒരു 'ഗുഡ് ബോയ്' ഇമേജ് സൂക്ഷിക്കാൻ താൻ നിർബന്ധിതനായിരുന്നുവെന്ന് അദ്ദേഹം പറയുന്നു.
തന്റെ ബെസ്റ്റ് ഫ്രണ്ട് പോലും പല കാര്യങ്ങളും തന്നിൽ നിന്ന് മറച്ചുവെച്ചിരുന്നുവെന്ന് ബേസിൽ ഓർക്കുന്നു. ക്ലാസിൽ മറ്റുള്ളവർ ആസ്വദിച്ചിരുന്ന പല തമാശകളും തനിക്ക് മനസ്സിലാക്കാൻ സാധിച്ചിരുന്നില്ല. അക്കാലത്ത് അധ്യാപകരുടെ പ്രിയപ്പെട്ട വിദ്യാർത്ഥിയായിരുന്ന തനിക്ക്, കോളേജ് ജീവിതത്തിലേക്ക് എത്തിയതോടെയാണ് യഥാർത്ഥ സ്വാതന്ത്ര്യം ലഭിച്ചത്. തിരുവനന്തപുരത്തെ കോളേജ് ജീവിതം തന്നെ ഒരു 'സ്ട്രീറ്റ് സ്മാർട്ട്' വ്യക്തിയാക്കി മാറ്റിയെന്നും അദ്ദേഹം കൂട്ടിച്ചേർത്തു.
വിനീത് ശ്രീനിവാസന്റെ അസിസ്റ്റന്റ് ഡയറക്ടറായി സിനിമയിൽ എത്തിയപ്പോൾ താൻ വലിയൊരു പ്രതിസന്ധിയെ നേരിട്ടിരുന്നു. കൂടെയുണ്ടായിരുന്നവർ ലോക സിനിമയെക്കുറിച്ച് സംസാരിക്കുമ്പോൾ, താൻ എടുത്ത തീരുമാനം തെറ്റായിപ്പോയോ എന്ന് പലപ്പോഴും തോന്നിയിട്ടുണ്ട്. മികച്ച ശമ്പളമുള്ള ജോലി ഉപേക്ഷിച്ചുവന്നതിനാൽ തിരികെ പോകാൻ വഴികളില്ലായിരുന്നു. ഒടുവിൽ സിനിമ പഠിക്കാമെന്ന് ഉറപ്പിച്ച് അവിടെത്തന്നെ തുടരാൻ തീരുമാനിക്കുകയായിരുന്നു.
തുടക്കത്തിൽ നാട്ടുകാർ പോലും തന്റെ സിനിമാ മോഹത്തെ അവജ്ഞയോടെയാണ് കണ്ടിരുന്നത്. പള്ളീലച്ചന്റെ മകൻ സിനിമയിൽ അഭിനയിക്കാൻ പോകുന്നു എന്നതിനെ അവർ അത്ര ഗൗരവത്തിൽ കണ്ടിരുന്നില്ല. എന്നാൽ ഇന്ന് ബോളിവുഡ് താരങ്ങൾ പോലും ബേസിലിന്റെ ആരാധകരായി മാറിയിരിക്കുന്നു എന്നത് അദ്ദേഹത്തിന്റെ കഠിനാധ്വാനത്തിന്റെ വിജയമാണ്.
Photo and News Source: Filmibeat
