വിദേശ കോച്ചിന് വേണ്ടി തന്നെ മാറ്റിയെന്ന് പി.ആർ ശ്രീജേഷ്; ഹോക്കി ഇന്ത്യക്കെതിരെ രൂക്ഷ വിമർശനം

ഇന്ത്യൻ ഹോക്കിയിലെ ഇതിഹാസ താരവും ജൂനിയർ പുരുഷ ടീമിന്റെ പരിശീലകനുമായിരുന്ന പി.ആർ ശ്രീജേഷ്, ഹോക്കി ഇന്ത്യയുടെ നടപടിക്കെതിരെ പരസ്യമായി രംഗത്ത്. വിദേശ പരിശീലകനെ നിയമിക്കുന്നതിന്റെ ഭാഗമായി തന്നെ പരിശീലക സ്ഥാനത്ത് നിന്ന് മാറ്റിയെന്ന് ശ്രീജേഷ് സാമൂഹ്യ മാധ്യമങ്ങളിലൂടെ ആരോപിച്ചു. ഇന്ത്യൻ സീനിയർ ടീം പരിശീലകൻ ക്രെയിഗ് ഫുൾട്ടന്റെ നിർദ്ദേശപ്രകാരമാണ് ഈ തീരുമാനമെന്നും അദ്ദേഹം വ്യക്തമാക്കി.

തന്റെ കീഴിൽ ജൂനിയർ ടീം മികച്ച പ്രകടനമാണ് കാഴ്ചവെച്ചതെന്ന് ശ്രീജേഷ് ചൂണ്ടിക്കാട്ടി. പങ്കെടുത്ത അഞ്ച് പ്രധാന ടൂർണമെന്റുകളിലും മെഡൽ നേടാൻ ടീമിന് സാധിച്ചു. ഇതിൽ ലോകകപ്പ് വെങ്കല മെഡലും ഉൾപ്പെടുന്നു. "പ്രകടനത്തിന്റെ പേരിൽ കോച്ചുമാരെ പുറത്താക്കുന്നത് കേട്ടിട്ടുണ്ട്, എന്നാൽ വിദേശ കോച്ചിന് വേണ്ടി ഒരാളെ മാറ്റുന്നത് ആദ്യമായാണ് അനുഭവിക്കുന്നത്" എന്ന് ശ്രീജേഷ് എക്സിൽ കുറിച്ചു.

അതേസമയം, ശ്രീജേഷിനെ പുറത്താക്കിയിട്ടില്ലെന്ന് ഹോക്കി ഇന്ത്യ അധികൃതർ വിശദീകരിച്ചു. ജൂനിയർ ടീം പരിശീലകനായി ശ്രീജേഷിന് ഉണ്ടായിരുന്ന കരാർ കാലാവധി 2025 ഡിസംബറിൽ അവസാനിച്ചിരുന്നു. കരാർ കാലാവധി പൂർത്തിയായതിനെ തുടർന്നാണ് അദ്ദേഹം സ്ഥാനമൊഴിഞ്ഞതെന്നും, ഇത് സ്വാഭാവികമായ നടപടി മാത്രമാണെന്നും ഹോക്കി ഫെഡറേഷൻ വ്യക്തമാക്കി. ജൂനിയർ തലം മുതൽ സീനിയർ തലം വരെ ഒരേ ശൈലി പിന്തുടരുന്നതിന്റെ ഭാഗമായാണ് വിദേശ പരിശീലകനെ പരിഗണിക്കുന്നതെന്നും അവർ കൂട്ടിച്ചേർത്തു.

Photo and News Source: Kerala Kaumudi Latest