മുഖ്യമന്ത്രിച്ചർച്ചയെ ട്രോളി മിൽമ; 'ആരാണ് മുഖ്യൻ' ചോദ്യം സോഷ്യൽ മീഡിയയിൽ വൈറൽ

കോൺഗ്രസിലെ മുഖ്യമന്ത്രി സ്ഥാനാർത്ഥിയെ ചൊല്ലിയുള്ള ചർച്ചകൾ പത്താം ദിവസത്തിലേക്ക് കടക്കുമ്പോൾ, രസകരമായ ട്രോളുമായി രംഗത്തെത്തിയിരിക്കുകയാണ് മിൽമ. 'ആരാണ് മുഖ്യൻ, മൂന്നാളും നാടിന്റെ പൊന്നോമനകൾ' എന്ന തലക്കെട്ടോടെ മിൽമയുടെ ഉത്പന്നങ്ങൾ ഉൾപ്പെടുത്തി തയ്യാറാക്കിയ പോസ്റ്ററുകൾ സോഷ്യൽ മീഡിയയിൽ വലിയ ചർച്ചയായി മാറിയിരിക്കുകയാണ്.

മിൽമയുടെ ലസി, പിസ്ത ജോയ്, പ്ലസ് റോസ് എന്നീ ഉത്പന്നങ്ങളെ ഉൾപ്പെടുത്തിയാണ് 'മൂന്നിലാര് മുഖ്യൻ' എന്ന ചോദ്യം ഉയർത്തിയിരിക്കുന്നത്. ഇതിനു പുറമെ, മിൽമയുടെ പ്രൈം, ലോങ്ലൈഫ്, റിച്ച് എന്നീ പാൽ പായ്ക്കറ്റുകൾ ഉപയോഗിച്ചും സമാനമായ പരസ്യം നൽകിയിട്ടുണ്ട്. 'ഞങ്ങൾ തമ്മിൽ മത്സരമില്ല, മൂന്നാളും നാടിന് ഒരുപോലെ വേണ്ടപ്പെട്ടവർ' എന്ന് വ്യക്തമാക്കിക്കൊണ്ടാണ് ഈ പരസ്യങ്ങൾ മിൽമയുടെ ഔദ്യോഗിക ഫെയ്സ്ബുക്ക്, ഇൻസ്റ്റഗ്രാം പേജുകളിൽ പങ്കുവെച്ചിരിക്കുന്നത്.

മിൽമയുടെ ഈ സോഷ്യൽ മീഡിയ കാർഡുകൾ ഇതിനോടകം തന്നെ വലിയ തോതിൽ ഷെയർ ചെയ്യപ്പെട്ടു കഴിഞ്ഞു. രാഷ്ട്രീയ നേതാക്കളെ പരിഹസിക്കുന്ന രീതിയിലുള്ള കമന്റുകളാണ് പോസ്റ്റിന് താഴെ നിറയുന്നത്. മിൽമയുടെ മുൻകാല പരസ്യങ്ങൾ പലതും വിവാദങ്ങൾക്ക് വഴിവെച്ചിരുന്നു. ഷാഫി പറമ്പിൽ എം.പി.യെ പരിഹസിച്ചും, ബി.ജെ.പി. മാർച്ചിലെ വിദ്യാർത്ഥിയെ കാരിക്കേച്ചർ ചെയ്തും നൽകിയ പരസ്യങ്ങൾ വലിയ പ്രതിഷേധത്തെ തുടർന്ന് പിൻവലിക്കേണ്ടി വന്നിരുന്നു.

മിൽമയെ കൂടാതെ മറ്റ് പല റസ്റ്ററന്റുകളും ബേക്കറികളും കോൺഗ്രസിലെ മുഖ്യമന്ത്രി ചർച്ചയെ പ്രമേയമാക്കി തങ്ങളുടെ ഉത്പന്നങ്ങൾക്കായി പരസ്യങ്ങൾ പ്രചരിപ്പിക്കുന്നുണ്ട്. രാഷ്ട്രീയ സാഹചര്യങ്ങളെ തങ്ങളുടെ വിപണന തന്ത്രങ്ങൾക്കായി ഉപയോഗിക്കുന്ന മിൽമയുടെ രീതി ഇത്തവണയും വലിയ ശ്രദ്ധയാണ് പിടിച്ചുപറ്റിയിരിക്കുന്നത്.

Photo and News Source: Mathrubhumi