തിരഞ്ഞെടുപ്പ് ഫലപ്രഖ്യാപനത്തിന് ശേഷം ഒമ്പത് ദിവസങ്ങൾ പിന്നിടുമ്പോഴും കേരളത്തിലെ പുതിയ മുഖ്യമന്ത്രി ആരായിരിക്കുമെന്ന കാര്യത്തിൽ തുടരുന്ന അനിശ്ചിതത്വത്തിന് ഉടൻ വിരാമമായേക്കും. ഇതുമായി ബന്ധപ്പെട്ട് നിർണായകമായ ചർച്ചകൾക്കായി രാഹുൽ ഗാന്ധിയും മല്ലികാർജുൻ ഖാർഗെയും ഇന്ന് വൈകീട്ട് 5.30-ന് ഖാർഗെയുടെ വസതിയിൽ കൂടിക്കാഴ്ച നടത്തും. ഈ കൂടിക്കാഴ്ചയ്ക്ക് ശേഷം അന്തിമ തീരുമാനം പുറത്തുവരുമെന്നാണ് ഹൈക്കമാൻഡ് വൃത്തങ്ങൾ നൽകുന്ന സൂചന.
കേരളത്തിലെ മുതിർന്ന നേതാക്കളുമായുള്ള പ്രാഥമിക ചർച്ചകൾ ഡൽഹിയിൽ ഇതിനകം പൂർത്തിയായിട്ടുണ്ട്. വി.എം. സുധീരൻ ഉൾപ്പെടെയുള്ള നേതാക്കൾ ഇതിനോടകം കേരളത്തിലേക്ക് മടങ്ങിയിട്ടുണ്ട്. എ.ഐ.സി.സി ജനറൽ സെക്രട്ടറി ദീപാദാസ് മുൻഷിയും കെ.പി.സി.സി വർക്കിങ് പ്രസിഡന്റുമാരും കേരളത്തിലേക്ക് തിരിക്കുമെന്നാണ് വിവരം. മല്ലികാർജുൻ ഖാർഗെ, പ്രിയങ്ക ഗാന്ധി, സോണിയ ഗാന്ധി എന്നിവരുടെ അഭിപ്രായങ്ങളും എ.ഐ.സി.സി നിരീക്ഷകർ സമർപ്പിച്ച റിപ്പോർട്ടും പരിഗണിച്ചായിരിക്കും പതിനാറാം നിയമസഭയിലെ മുഖ്യമന്ത്രിയെ ഹൈക്കമാൻഡ് പ്രഖ്യാപിക്കുക.
മുന്നണിയിലെ പ്രധാന കക്ഷിയായ മുസ്ലിം ലീഗിന്റെ നിലപാടും ഹൈക്കമാൻഡ് അതീവ ഗൗരവത്തോടെയാണ് കാണുന്നത്. കെ.സി. വേണുഗോപാൽ, വി.ഡി. സതീശൻ, രമേശ് ചെന്നിത്തല എന്നിവരുടെ പേരുകൾ പരിഗണനയിലുണ്ടെങ്കിലും, ഘടകകക്ഷികളുടെ പിന്തുണയും പൊതുജനാഭിപ്രായവും അന്തിമ തീരുമാനത്തിൽ നിർണായകമാകും. ഇന്ന് രാത്രിയോടുകൂടി തന്നെ മുഖ്യമന്ത്രിയെ സംബന്ധിച്ച ഔദ്യോഗിക പ്രഖ്യാപനം ഉണ്ടാകുമെന്നാണ് പ്രതീക്ഷിക്കുന്നത്. പ്രഖ്യാപനം ഡൽഹിയിൽ നിന്നാണോ അതോ കേരളത്തിൽ വെച്ചാണോ എന്ന കാര്യത്തിൽ മാത്രമാണ് ഇനി വ്യക്തത വരാനുള്ളത്.
Photo and News Source: Mathrubhumi
