മലയാള സിനിമയിലെ യുവതാരവും സുരേഷ് ഗോപിയുടെ മകനുമായ മാധവ് സുരേഷ് തന്റെ രാഷ്ട്രീയ നിലപാടുകൾ വ്യക്തമാക്കുന്നു. തമിഴ്നാട് മുഖ്യമന്ത്രി വിജയിയെക്കുറിച്ചും പ്രധാനമന്ത്രി നരേന്ദ്ര മോദിയെക്കുറിച്ചുമുള്ള മാധവിന്റെ അഭിപ്രായങ്ങൾ ഇപ്പോൾ സോഷ്യൽ മീഡിയയിൽ ചർച്ചയാവുകയാണ്. തന്റേതായ നിലപാടുകൾ തുറന്നു പറയുന്നതിൽ മടിയില്ലാത്ത മാധവ്, വിമർശനങ്ങളെയും ട്രോളുകളെയും കാര്യമാക്കാറില്ല.
തമിഴ്നാട് മുഖ്യമന്ത്രി വിജയിയെക്കുറിച്ച് സംസാരിക്കവെ, അദ്ദേഹം വെറുതെ മുഖ്യമന്ത്രി കളിച്ച് പോകാൻ വന്ന ആളല്ലെന്ന് മാധവ് അഭിപ്രായപ്പെട്ടു. "ഒരു രാഷ്ട്രീയ പശ്ചാത്തലവും ഇല്ലാത്ത ആളാണ് ദളപതി. അദ്ദേഹത്തിന് വ്യക്തമായ പ്ലാനുകളുണ്ട്. തമിഴ്നാട് ജനങ്ങൾക്ക് വേണ്ടി എന്ത് ചെയ്യണമെന്നുള്ളതിൽ വ്യക്തമായ ധാരണ അദ്ദേഹത്തിനുണ്ട്. അദ്ദേഹത്തിന്റെ വാഗ്ദാനങ്ങൾ എങ്ങനെ പ്രായോഗികമാക്കുന്നു എന്ന് കാണാൻ ഞാൻ കാത്തിരിക്കുകയാണ്. തമിഴ്നാടിന് അദ്ദേഹം നല്ലൊരു മുഖ്യമന്ത്രി ആകട്ടെ," മാധവ് പറഞ്ഞു.
പ്രധാനമന്ത്രി നരേന്ദ്ര മോദിയെക്കുറിച്ചുള്ള ചോദ്യത്തിന് മറുപടിയായി, മോദിയല്ലാതെ ഇന്ത്യയുടെ പ്രധാനമന്ത്രിയാകാൻ യോഗ്യതയുള്ള മറ്റാരാണുള്ളതെന്ന് മാധവ് ചോദിക്കുന്നു. ഇത് തന്റെ രാഷ്ട്രീയ അജണ്ടയല്ലെന്നും അദ്ദേഹം വ്യക്തമാക്കി. കേരളത്തിലെ രാഷ്ട്രീയ സാഹചര്യത്തെക്കുറിച്ച് സംസാരിക്കുമ്പോൾ, ഏത് പാർട്ടി അധികാരത്തിൽ വന്നാലും സംസ്ഥാനത്തെ നന്നായി നോക്കിയാൽ മതിയെന്നാണ് മാധവിന്റെ നിലപാട്. കേരളത്തിൽ ബിജെപിക്ക് വലിയ മാറ്റങ്ങൾ കൊണ്ടുവരാൻ കഴിയില്ലെന്നും, വിജയിച്ച കോൺഗ്രസ് പാർട്ടി അടുത്ത അഞ്ച് വർഷം കേരളത്തെ നന്നായി നോക്കട്ടെ എന്നും അദ്ദേഹം കൂട്ടിച്ചേർത്തു.
Photo and News Source: Asianet News
