കാസർകോട്: ബാവിക്കര ജലപദ്ധതിയിലെ കുടിവെള്ളവിതരണം പൂർണമായും പുനരാരംഭിക്കാൻ കളക്ടർ അർജുൻ പാണ്ഡ്യൻ നിർദ്ദേശിച്ചു. വൈദ്യുതി വിതരണ തടസ്സങ്ങൾ പരിഹരിച്ച് ഉടൻ പ്രവർത്തനം ആരംഭിക്കണമെന്നും അദ്ദേഹം ജലാതോറിറ്റി ഉദ്യോഗസ്ഥനോട് ആവശ്യപ്പെട്ടു.
ജില്ലയിലെ കുടിവെള്ളക്ഷാമം രൂക്ഷമായ പശ്ചാത്തലത്തിൽ എല്ലാ പ്രദേശങ്ങളിലും ജലവിതരണം ഉറപ്പാക്കണമെന്നും കളക്ടർ വ്യക്തമാക്കി. ടാങ്കറുകൾ വഴി ജലവിതരണം നടത്തുന്നതിന് തദ്ദേശസ്വയംഭരണവകുപ്പിനെ ചുമതലപ്പെടുത്തുകയും പട്ടികവർഗ്ഗ വികസന ഓഫീസറെ ഉന്നതികളിൽ ജലം ലഭ്യമാക്കാൻ നിർദ്ദേശിക്കുകയും ചെയ്തു.
സ്കൂൾ കെട്ടിടങ്ങളുടെ അറ്റകുറ്റപ്പണികൾ സമയബന്ധിതമായി പൂർത്തിയാക്കാനും എം.സി.സി. നിയന്ത്രണങ്ങൾ ബാധിക്കാതിരിക്കാനും അദ്ദേഹം ഓർമ്മിപ്പിച്ചു. ജില്ലയിൽ വേനൽക്കാലത്ത് കുടിവെള്ളവിതരണം ഉറപ്പാക്കാൻ ആരോഗ്യസുരക്ഷാ നടപടികളും ഊർജ്ജിതമാക്കി. ഭൂഗർഭജലനിരപ്പ് കുറഞ്ഞതിനാൽ ജലസ്രോതസ്സുകളുടെ സംരക്ഷണത്തിനും പ്രത്യേക ശ്രദ്ധ വേണമെന്ന് നിർദ്ദേശിച്ചു. വിദ്യാനഗർ ഉൾപ്പെടെ വിവിധ മേഖലകളിൽ പമ്പിങ് തടസ്സങ്ങൾ പരിഹരിക്കാൻ കെ.എസ്.ഇ.ബിയും ജലാതോറിറ്റിയും ഏകോപിച്ച് പ്രവർത്തിക്കേണ്ടതുമാണ്.
Photo and News Source: Mathrubhumi
