തന്റെ ജീവിതത്തിലെ നിർണായകമായ വഴിത്തിരിവുകളെക്കുറിച്ചും ആരോഗ്യപ്രശ്നങ്ങളെക്കുറിച്ചും മനസ്സ് തുറക്കുകയാണ് പ്രശസ്ത അവതാരക രഞ്ജിനി ഹരിദാസ്. ഇരുപതുകളിൽ താൻ അനുഭവിച്ച ശാരീരിക ബുദ്ധിമുട്ടുകളും, പിന്നീട് ആയുർവേദ ചികിത്സയിലൂടെ ലഭിച്ച അത്ഭുതകരമായ മാറ്റത്തെക്കുറിച്ചുമാണ് രഞ്ജിനി തന്റെ വ്ളോഗിലൂടെ പങ്കുവെച്ചത്.
2003-2004 കാലഘട്ടത്തിൽ ബെംഗളൂരുവിലെ കോൾ സെന്ററിൽ ജോലി ചെയ്തിരുന്ന സമയത്താണ് രഞ്ജിനിക്ക് ആദ്യമായി ആരോഗ്യപ്രശ്നങ്ങൾ അനുഭവപ്പെടുന്നത്. രാത്രികാലങ്ങളിലെ ജോലി, ഉറക്കമില്ലായ്മ, അമിതമായ ചായ കുടി തുടങ്ങിയ അനാരോഗ്യകരമായ ജീവിതശൈലി ശരീരത്തിന്റെ ഒരു ഭാഗത്ത് തരിപ്പിന് കാരണമായി. നാട്ടിലെത്തി ഡോക്ടറെ കണ്ട് എംആർഐ സ്കാനിങ് നടത്തിയപ്പോൾ താൻ മാരകമായ രോഗാവസ്ഥയിലാണെന്ന് അന്ന് ഭയപ്പെട്ടിരുന്നതായി രഞ്ജിനി ഓർക്കുന്നു.
പിന്നീട് സ്റ്റാർ സിംഗർ ഉൾപ്പെടെയുള്ള പരിപാടികളുമായി തിരക്കിലായിരിക്കെ, ഒരു കാർ അപകടത്തെത്തുടർന്ന് രഞ്ജിനിക്ക് വീണ്ടും കടുത്ത വേദന അനുഭവപ്പെട്ടു. ഡിസ്ക് സംബന്ധമായ പ്രശ്നങ്ങളാണെന്നും സർജറി അനിവാര്യമാണെന്നും ഡോക്ടർമാർ നിർദ്ദേശിച്ചു. സർജറിക്കായി ബെഡ് ബുക്ക് ചെയ്ത് മടങ്ങുന്നതിനിടയിൽ ലഭിച്ച ഒരു സുഹൃത്തിന്റെ ഫോൺ കോൾ രഞ്ജിനിയുടെ ജീവിതം തന്നെ മാറ്റിമറിച്ചു.
ആ സുഹൃത്തിന്റെ നിർദ്ദേശപ്രകാരം ഡോക്ടർ സുരേഷിനെ കാണുകയും, ശസ്ത്രക്രിയയില്ലാതെ തന്നെ ആയുർവേദ ചികിത്സയിലൂടെ വേദന പൂർണ്ണമായും ഭേദമാവുകയും ചെയ്തു. ഇതൊരു മാജിക് പോലെയാണ് തനിക്ക് അനുഭവപ്പെട്ടതെന്ന് രഞ്ജിനി പറയുന്നു. അന്ന് മുതൽ ആയുർവേദം തന്റെ ജീവിതത്തിന്റെ അവിഭാജ്യ ഘടകമായി മാറിയെന്നും അവർ കൂട്ടിച്ചേർത്തു.
Photo and News Source: Asianet News
