കാലിഫോർണിയയിൽ ജോലി ചെയ്തിരുന്ന 37 വയസ്സുകാരനായ ഇന്ത്യൻ എൻജിനീയർ ചിരഞ്ജീവി കൊല്ല, അപൂർവ്വമായ ഫംഗസ് ബാധയെത്തുടർന്ന് അന്തരിച്ചു. സാധാരണ പനിയായി തുടങ്ങിയ രോഗലക്ഷണങ്ങൾ പിന്നീട് മാരകമായ 'വാലി ഫീവർ' (Valley Fever) ആണെന്ന് തിരിച്ചറിയുകയായിരുന്നു. വാൾനട്ട് ക്രീക്കിലെ കൈസർ പെർമനന്റ് ആശുപത്രിയിൽ വെന്റിലേറ്ററിന്റെ സഹായത്തോടെ ഒരു മാസത്തോളം ചികിത്സയിൽ കഴിഞ്ഞിരുന്നെങ്കിലും, അദ്ദേഹത്തിന്റെ ജീവൻ രക്ഷിക്കാൻ സാധിച്ചില്ല.
ഏപ്രിൽ മാസത്തിന്റെ തുടക്കത്തിലാണ് ചിരഞ്ജീവിക്ക് പനിയും ചുമയും അനുഭവപ്പെട്ടത്. തുടക്കത്തിൽ സാധാരണ അസുഖമാണെന്ന് കരുതിയെങ്കിലും ആരോഗ്യനില വഷളായതിനെത്തുടർന്ന് അദ്ദേഹത്തെ അത്യാഹിത വിഭാഗത്തിൽ പ്രവേശിപ്പിച്ചു. ആദ്യം ന്യുമോണിയ ആണെന്ന് സംശയിച്ചിരുന്നെങ്കിലും, വിശദമായ പരിശോധനയിൽ തെക്കുപടിഞ്ഞാറൻ അമേരിക്കൻ സംസ്ഥാനങ്ങളിൽ കാണപ്പെടുന്ന 'കോക്സിഡിയോയിഡ്സ്' എന്ന ഫംഗസ് മൂലമുണ്ടാകുന്ന അണുബാധയാണെന്ന് സ്ഥിരീകരിക്കുകയായിരുന്നു. ഈ ഫംഗസ് അദ്ദേഹത്തിന്റെ ശ്വാസകോശത്തെ പൂർണ്ണമായും തകരാറിലാക്കി.
ഹൈദരാബാദ് സ്വദേശിയായ ചിരഞ്ജീവി, ഭാര്യ പവനി മറെല്ലയും അഞ്ച് വയസ്സുള്ള മകൻ വിഹാനും അടങ്ങുന്ന കുടുംബത്തിന്റെ ഏക ആശ്രയമായിരുന്നു. അദ്ദേഹത്തിന്റെ വിയോഗം കുടുംബത്തെ വലിയ പ്രതിസന്ധിയിലാക്കിയിരിക്കുകയാണ്. ചികിത്സാ ചെലവുകൾക്കും മൃതദേഹം നാട്ടിലെത്തിക്കുന്നതിനുമായി ബന്ധുക്കൾ ക്രൗഡ് ഫണ്ടിംഗ് വഴി സഹായം തേടുന്നുണ്ട്.
കാലിഫോർണിയ, അരിസോണ തുടങ്ങിയ വരണ്ട പ്രദേശങ്ങളിലെ മണ്ണിൽ കാണപ്പെടുന്ന ഈ ഫംഗസ്, ശ്വസനത്തിലൂടെയാണ് മനുഷ്യരിലേക്ക് പകരുന്നത്. കാറ്റിലൂടെയോ മണ്ണ് ഇളകുമ്പോഴോ വായുവിൽ കലരുന്ന ഈ സൂക്ഷ്മജീവികൾ ശ്വാസകോശത്തിൽ പ്രവേശിക്കുമ്പോഴാണ് രോഗബാധയുണ്ടാകുന്നത്. മിക്കവരിലും ചെറിയ പനിയായി മാറുമെങ്കിലും, ചിലരിൽ ഇത് ചിരഞ്ജീവിയുടെ കാര്യത്തിലെന്നപോലെ മാരകമായ ആരോഗ്യപ്രശ്നങ്ങൾക്ക് കാരണമാകാറുണ്ട്.
Photo and News Source: Media Mangalam
