ആലപ്പുഴയിലെ കുട്ടികളുടെ പ്രിയപ്പെട്ട വേദിയായ 'ചിക്കൂസ്' സംഘടിപ്പിച്ച 40-ാമത് അവധിക്കാല കളിയരങ്ങ് സമാപനത്തിലേക്ക്. ഏപ്രിൽ 1-ന് കിടങ്ങാംപറമ്പ് സ്കൂളിൽ ആരംഭിച്ച ഈ വേനൽക്കാല ക്യാമ്പ് മേയ് 16-ന് ഔദ്യോഗികമായി കളംപിരിയും. കുട്ടികളുടെ സർഗ്ഗവാസനകൾ പരിപോഷിപ്പിക്കുന്നതിനായി കഴിഞ്ഞ ഒന്നര മാസമായി വിവിധ പരിപാടികളാണ് ഇവിടെ നടന്നുവരുന്നത്.
സമാപന ചടങ്ങിൽ 2025-ലെ ചിക്കൂസ് പുരസ്കാരങ്ങൾ വിതരണം ചെയ്യും. ബാലസാഹിത്യരംഗത്തെ സമഗ്ര സംഭാവന പരിഗണിച്ച് നൈന മണ്ണഞ്ചേരിയെയും, നൃത്തരംഗത്തെ മികച്ച പ്രവർത്തനങ്ങൾക്ക് പ്രവീൺ നാട്യകലയെയും പുരസ്കാരം നൽകി ആദരിക്കും. ഇവർക്കൊപ്പം വിവിധ മേഖലകളിൽ മികവ് തെളിയിച്ച ബാലപ്രതിഭകൾക്കും പുരസ്കാരങ്ങൾ സമ്മാനിക്കും.
ശാസ്ത്രീയ സംഗീതത്തിൽ വരദ് പാർഥസാരഥി, സാഹിത്യത്തിൽ അൻജന മധു, വീട്ടുമുറ്റകൃഷിയിൽ ഫരിയ ഫിറോസ്, ഫാദിയ ഫിറോസ്, നൃത്തത്തിൽ അന്നപൂർണ എന്നിവർക്കാണ് ബാലപ്രതിഭാ പുരസ്കാരങ്ങൾ ലഭിക്കുക. സമാപന സമ്മേളനത്തോടനുബന്ധിച്ച് കുട്ടികൾ അവതരിപ്പിക്കുന്ന വിവിധ കലാപരിപാടികളും അരങ്ങേറും.
Photo and News Source: Kerala Kaumudi
