വിശ്വാസ്യതയ്ക്കും മികച്ച എഞ്ചിൻ കരുത്തിനും പേരുകേട്ട ജാപ്പനീസ് ഇരുചക്ര വാഹന നിർമാതാക്കളായ ഹോണ്ട, തങ്ങളുടെ 300 സിസി മോട്ടോർസൈക്കിളായ CB300F വിപണിയിൽ നിന്ന് പിൻവലിച്ചു. റോയൽ എൻഫീൽഡ് അടക്കമുള്ള ബ്രാൻഡുകൾക്ക് വെല്ലുവിളിയായി സിബി 350 സീരീസ് മികച്ച പ്രകടനം കാഴ്ചവെക്കുമ്പോഴും, സിബി 300എഫ് മോഡലിന് വിപണിയിൽ കാര്യമായ ചലനം സൃഷ്ടിക്കാൻ സാധിച്ചിരുന്നില്ല. ഇതേത്തുടർന്നാണ് കമ്പനി ഈ മോഡലിനെ നിശബ്ദമായി ഒഴിവാക്കിയത്.
ഇന്ത്യയിലെ ഹോണ്ടയുടെ ഏക ഫ്ലെക്സ്-ഫ്യുവൽ മോട്ടോർസൈക്കിൾ എന്ന പ്രത്യേകതയും ഈ ബൈക്കിനുണ്ടായിരുന്നു. 85 ശതമാനം എഥനോളും 15 ശതമാനം പെട്രോളും ചേർന്ന മിശ്രിതത്തിൽ പ്രവർത്തിക്കാൻ ശേഷിയുള്ള E85 കംപ്ലയിന്റ് എഞ്ചിനായിരുന്നു ഇതിൽ സജ്ജീകരിച്ചിരുന്നത്. എന്നാൽ, ആകർഷകമായ ഡിസൈൻ ഉണ്ടായിരുന്നിട്ടും, ക്ലാസ്-ലീഡിംഗ് പെർഫോമൻസ് കാഴ്ചവെക്കുന്നതിൽ പരാജയപ്പെട്ടതാണ് ബൈക്കിന്റെ വിൽപ്പനയെ ബാധിച്ചത്.
293.52 സിസി എഞ്ചിനിൽ പ്രവർത്തിച്ചിരുന്ന ഈ ബൈക്ക് 24 bhp കരുത്തും 25.6 Nm ടോർക്കുമാണ് ഉത്പാദിപ്പിച്ചിരുന്നത്. 6-സ്പീഡ് ഗിയർബോക്സ്, ഡ്യുവൽ-ചാനൽ എബിഎസ്, ട്രാക്ഷൻ കൺട്രോൾ, അസിസ്റ്റ് സ്ലിപ്പർ ക്ലച്ച് തുടങ്ങിയ ആധുനിക ഫീച്ചറുകൾ ഇതിൽ ഉൾപ്പെടുത്തിയിരുന്നു. ജിഎസ്ടി പരിഷ്കരണത്തിന് ശേഷം വില 1.55 ലക്ഷം രൂപയായി കുറച്ചിട്ടും ഉപഭോക്താക്കളെ ആകർഷിക്കാൻ ബൈക്കിന് സാധിച്ചില്ല.
ഇന്ത്യൻ വിപണിയിൽ ഏറ്റവും കുറഞ്ഞ വിലയിൽ ലഭിക്കുന്ന 300 സിസി ബൈക്കുകളിൽ ഒന്നായി മാറിയിട്ടും സിബി 300എഫ് പടിയിറങ്ങിയത് പലരെയും അത്ഭുതപ്പെടുത്തിയിട്ടുണ്ട്. ഇനിമുതൽ 350 സിസി ശ്രേണിയിലുള്ള മോഡലുകളിൽ കൂടുതൽ ശ്രദ്ധ കേന്ദ്രീകരിക്കാനാണ് ഹോണ്ടയുടെ തീരുമാനം. പ്രീമിയം മോട്ടോർസൈക്കിൾ വിഭാഗത്തിൽ തങ്ങളുടെ സാന്നിധ്യം കൂടുതൽ ശക്തമാക്കാൻ ഈ നീക്കം സഹായിക്കുമെന്നാണ് കമ്പനിയുടെ വിലയിരുത്തൽ.
Photo and News Source: DriveSpark
