മുഖ്യമന്ത്രി സ്ഥാനാർത്ഥിയെ ചൊല്ലി കോൺഗ്രസിനുള്ളിലെ തർക്കങ്ങൾ പരിഹാരമില്ലാതെ തുടരുകയാണ്. ഹൈക്കമാൻഡ് എത്രയും വേഗം മുഖ്യമന്ത്രിയെ പ്രഖ്യാപിക്കാൻ ശ്രമിക്കുന്നുണ്ടെങ്കിലും, പാർട്ടി നേതാക്കൾക്കിടയിൽ സമവായത്തിലെത്താൻ കഴിയാത്തത് വലിയ പ്രതിസന്ധിയാണ് സൃഷ്ടിക്കുന്നത്. ഇന്നലെ നടന്ന നീണ്ട ചർച്ചകൾക്കൊടുവിലും അന്തിമ തീരുമാനത്തിൽ എത്താൻ സാധിച്ചില്ല.
ഇതോടെ, മുഖ്യമന്ത്രി ആരായിരിക്കണം എന്ന കാര്യത്തിൽ അന്തിമ തീരുമാനം എടുക്കാനുള്ള അധികാരം കോൺഗ്രസ് അധ്യക്ഷൻ മല്ലികാർജുൻ ഖാർഗയ്ക്കും രാഹുൽ ഗാന്ധിക്കും വിട്ടുനൽകിയിരിക്കുകയാണ്. ചർച്ചകളിൽ കെ.സി. വേണുഗോപാലിന് മുൻതൂക്കം ലഭിക്കുന്നുണ്ടെങ്കിലും, വി.ഡി. സതീശൻ തന്റെ നിലപാടിൽ ഉറച്ചുനിൽക്കുകയാണ്. തനിക്ക് മുഖ്യമന്ത്രി സ്ഥാനം ലഭിച്ചില്ലെങ്കിൽ മന്ത്രിസഭയിലേക്ക് ഇല്ലെന്നും, ആവശ്യമെങ്കിൽ എം.എൽ.എ സ്ഥാനം രാജിവെക്കുമെന്നും അദ്ദേഹം വ്യക്തമാക്കിയതായാണ് റിപ്പോർട്ടുകൾ.
ഈ തർക്കം രൂക്ഷമായി തുടർന്നാൽ, ഒത്തുതീർപ്പ് ഫോർമുല എന്ന നിലയിൽ രമേശ് ചെന്നിത്തലയെ പരിഗണിക്കാനുള്ള സാധ്യതയും തള്ളിക്കളയാനാവില്ല. മുഖ്യമന്ത്രി സ്ഥാനത്തെ ചൊല്ലിയുള്ള തർക്കം തെരുവിലേക്കും വിദ്യാർത്ഥി സംഘടനകളിലേക്കും വ്യാപിച്ചത് ഹൈക്കമാൻഡിനെ ആശങ്കയിലാക്കുന്നുണ്ട്. മുഖ്യമന്ത്രിയെ പ്രഖ്യാപിച്ചതിന് ശേഷവും പാർട്ടിയിൽ ഭിന്നത രൂക്ഷമാകുമോ എന്ന ഭയവും നേതൃത്വത്തിനുണ്ട്. വി.ഡി. സതീശന്റെ നേതൃത്വത്തിലുള്ള വിഭാഗത്തിന്റെ പരസ്യ പ്രതിഷേധങ്ങൾക്കെതിരെ പാർട്ടിയിൽ കടുത്ത വിമർശനങ്ങളും അച്ചടക്ക നടപടികളെക്കുറിച്ചുള്ള ചർച്ചകളും ഉയരുന്നുണ്ട്.
Photo and News Source: Kairali News
