യു.എ.ഇ ലോട്ടറിയുടെ ലക്കി ഡേ ഡ്രോയിൽ ദക്ഷിണാഫ്രിക്കയിൽ നിന്നുള്ള പ്രവാസിയായ ബ്രാണ്ടൻ തെക്റാം 5 മില്യൺ ദിർഹം സമ്മാനമായി നേടി. ബുധനാഴ്ച നടന്ന ഡ്രോയുടെ മടങ്ങിവരവിന് ശേഷം ഈ വലിയ തുക സ്വന്തമാക്കുന്ന ആദ്യ വ്യക്തിയാണ് 39 വയസ്സുകാരനായ ബ്രാണ്ടൻ. പതിവുപോലെ ഇമെയിൽ പരിശോധിക്കുന്നതിനിടയിലാണ് താൻ വിജയിയാണെന്ന വിവരം അദ്ദേഹം അറിയുന്നത്. ചെറിയൊരു തുകയാകും ലഭിച്ചിട്ടുണ്ടാകുക എന്ന് കരുതിയ ബ്രാണ്ടന്, സമ്മാനത്തുക കണ്ട് അവിശ്വസനീയമായ ഞെട്ടലാണ് ഉണ്ടായത്.
"ഇപ്പോഴും ഇത് ഉൾക്കൊള്ളാനായിട്ടില്ല. എങ്ങനെ ഇത് വിശദീകരിക്കണമെന്നും അറിയില്ല. ഞാൻ ദുബായിൽ ഒരു മില്യണയർ ആയി!" എന്ന് ബ്രാണ്ടൻ തന്റെ സന്തോഷം പങ്കുവെച്ചു. മകനെ സ്കൂളിലേക്ക് അയക്കുന്ന തിരക്കിലായിരുന്ന ഭാര്യയോട് വിവരം പറഞ്ഞപ്പോൾ ആദ്യം അവർക്ക് വിശ്വസിക്കാനായില്ലെന്നും, പിന്നീട് സന്തോഷം കൊണ്ട് പരസ്പരം കെട്ടിപ്പിടിച്ചുവെന്നും അദ്ദേഹം ഓർക്കുന്നു. സമ്മാനം ലഭിച്ച അന്ന് പതിവുപോലെ ജോലിക്ക് പോയ ബ്രാണ്ടൻ, വളരെ പക്വതയോടെയാണ് ഈ നേട്ടത്തെ കാണുന്നത്.
സമ്മാനത്തുക തന്റെ കുടുംബത്തിന്റെ ഭാവി സുരക്ഷിതമാക്കാനാണ് ബ്രാണ്ടൻ ഉപയോഗിക്കാൻ ഉദ്ദേശിക്കുന്നത്. തന്റെ ഭാര്യയുടെ പ്രോജക്റ്റ് വിപുലീകരിക്കുന്നതിനും, മകന് കൂടുതൽ മെച്ചപ്പെട്ട ആരോഗ്യസേവനങ്ങൾ ലഭ്യമാക്കുന്നതിനും ഈ തുക സഹായകമാകും. കൂടാതെ, മകന് ഓടിക്കളിക്കാൻ സൗകര്യമുള്ള ഒരു പുതിയ വീട്ടിലേക്ക് മാറാനും അദ്ദേഹം ആഗ്രഹിക്കുന്നു. ശുഭാപ്തി വിശ്വാസമാണ് തന്റെ വിജയത്തിന് പിന്നിലെന്ന് വിശ്വസിക്കുന്ന ബ്രാണ്ടൻ, മറ്റുള്ളവരുടെ വിജയങ്ങൾ തന്നെ എപ്പോഴും പ്രചോദിപ്പിക്കാറുണ്ടെന്നും കൂട്ടിച്ചേർത്തു.
ദി യു.എ.ഇ ലോട്ടറി പ്ലാറ്റ്ഫോം ഇതുവരെ 340,000 വിജയികൾക്കായി 300 മില്യൺ ദിർഹമാണ് സമ്മാനമായി നൽകിയിട്ടുള്ളത്. എല്ലാ ബുധൻ, ശനി ദിവസങ്ങളിലാണ് ലക്കി ഡേ ഡ്രോ നടക്കുന്നത്. 30 മില്യൺ ദിർഹമാണ് ഇതിലെ ഗ്രാൻഡ് പ്രൈസ്. ജനറൽ കൊമേഴ്സ്യൽ ഗെയിമിങ് റെഗുലേറ്ററി അഥോറിറ്റിയുടെ അംഗീകാരത്തോടെ പ്രവർത്തിക്കുന്ന ഈ ലോട്ടറിയിൽ പങ്കെടുക്കാൻ താല്പര്യമുള്ളവർക്ക് ഔദ്യോഗിക വെബ്സൈറ്റ് സന്ദർശിക്കാവുന്നതാണ്.
Photo and News Source: Asianet News
