ഇടുക്കി നെടുങ്കണ്ടം പച്ചടിയിൽ നടന്ന ഇരട്ടക്കൊലപാതകത്തിൽ ഞെട്ടിക്കുന്ന വിവരങ്ങളാണ് പുറത്തുവരുന്നത്. അമ്മ മേരിക്കുട്ടിയെയും സഹോദരൻ റെജിയെയും കൊലപ്പെടുത്തിയ കേസിൽ പിടിയിലായ സജി, എട്ട് വർഷം മുമ്പ് കാണാതായ തന്റെ പിതാവ് മാത്യുവിനെയും കൊലപ്പെടുത്തി കുഴിച്ചുമൂടിയതായാണ് പോലീസിന്റെ പ്രാഥമിക നിഗമനം. ഈ സംശയത്തിന്റെ അടിസ്ഥാനത്തിൽ സജിയുടെ പുരയിടത്തിൽ പോലീസ് പരിശോധനയും കുഴിച്ചുള്ള തെളിവെടുപ്പും ആരംഭിച്ചു.
2018 മാർച്ചിലാണ് മാത്യുവിനെ കാണാതായത്. അമ്മയെയും സഹോദരനെയും കൊലപ്പെടുത്തിയ സംഭവത്തിൽ സജിയെ ചോദ്യം ചെയ്തപ്പോഴാണ് പിതാവിന്റെ തിരോധാനത്തിന് പിന്നിലെ ക്രൂരമായ സത്യങ്ങൾ പുറത്തുവന്നത്. താൻ തനിച്ചാണ് അമ്മയെയും സഹോദരനെയും കൊലപ്പെടുത്തിയതെന്ന് സജി പോലീസിനോട് കുറ്റസമ്മതം നടത്തിയിട്ടുണ്ട്. കഴിഞ്ഞ നാലാം തീയതി രാത്രി മദ്യപിച്ചെത്തിയ സജിയും റെജിയും തമ്മിൽ ഉണ്ടായ വാക്കുതർക്കമാണ് കൊലപാതകത്തിൽ കലാശിച്ചത്.
റെജിയെ ക്രൂരമായി മർദ്ദിച്ച ശേഷം ഷൂസ് ധരിച്ച കാൽ കൊണ്ട് കഴുത്തിൽ ചവിട്ടിപ്പിടിക്കുകയും, തോർത്ത് ഉപയോഗിച്ച് കഴുത്ത് മുറുക്കി മരണം ഉറപ്പാക്കുകയുമായിരുന്നുവെന്ന് സജി മൊഴി നൽകി. ഈ ദൃശ്യങ്ങൾ കണ്ടുനിന്ന അമ്മ മേരിക്കുട്ടിയെയും സജി മർദ്ദിച്ച് കൊലപ്പെടുത്തി. വിവാഹത്തിന് തടസ്സം നിന്നതും സ്വത്തുമായി ബന്ധപ്പെട്ട തർക്കങ്ങളുമാണ് കൊലപാതകത്തിലേക്ക് നയിച്ചതെന്ന് പ്രതി പോലീസിനോട് വ്യക്തമാക്കി.
കൊലപാതകത്തിന് ശേഷം രണ്ട് ദിവസത്തോളം മൃതദേഹങ്ങൾ വീട്ടിൽ സൂക്ഷിക്കുകയും പിന്നീട് പറമ്പിൽ കുഴിച്ചുമൂടുകയുമായിരുന്നു. തുടർന്ന് യാതൊരു ഭാവഭേദവുമില്ലാതെ സജി വീട്ടിൽ തന്നെ താമസിച്ചു വരികയായിരുന്നു. പിതാവിന്റെ കൊലപാതകത്തെക്കുറിച്ചുള്ള കൂടുതൽ വിവരങ്ങൾ കൂടി പുറത്തുവരുന്നതോടെ കേസ് കൂടുതൽ ഗൗരവകരമായ തലത്തിലേക്ക് നീങ്ങുകയാണ്.
Photo and News Source: Malayalam Express
