കേരളത്തിലെ പുതിയ മുഖ്യമന്ത്രിയെ തിരഞ്ഞെടുക്കുന്നതുമായി ബന്ധപ്പെട്ട് ഉയരുന്ന ചർച്ചകളിൽ പ്രതികരണവുമായി മുതിർന്ന കോൺഗ്രസ് നേതാവ് കെ മുരളീധരൻ രംഗത്തെത്തി. മുഖ്യമന്ത്രിയെ കണ്ടെത്താൻ ഇത്രയധികം തിരക്ക് കാണിക്കേണ്ടതില്ലെന്നും, ഈ മാസം 23 വരെ അതിനായി സമയമുണ്ടെന്നും അദ്ദേഹം മാധ്യമങ്ങളോട് വ്യക്തമാക്കി. ജനവികാരം കൂടി പരിഗണിച്ചുകൊണ്ടുള്ള ഉചിതമായ തീരുമാനമായിരിക്കും ഹൈക്കമാൻഡിന്റെ ഭാഗത്തുനിന്നുണ്ടാകുക എന്ന് അദ്ദേഹം പ്രത്യാശ പ്രകടിപ്പിച്ചു.
ഫ്ലക്സ് ബോർഡുകളുടെ വലിപ്പമോ എണ്ണമോ നോക്കിയല്ല മുഖ്യമന്ത്രിയെ തീരുമാനിക്കുന്നതെന്ന് അദ്ദേഹം ഓർമ്മിപ്പിച്ചു. മണ്ഡലത്തിലെ ജനവികാരം കണക്കിലെടുത്ത് താൻ സ്വീകരിക്കേണ്ട നിലപാട് നേതൃത്വത്തെ അറിയിച്ചിട്ടുണ്ടെന്നും, ഹൈക്കമാൻഡ് എടുക്കുന്ന ഏത് തീരുമാനവും പൂർണ്ണമനസ്സോടെ അംഗീകരിക്കുമെന്നും അദ്ദേഹം വ്യക്തമാക്കി. കോൺഗ്രസിനുള്ളിലെ ഇത്തരം ചർച്ചകൾ ജനാധിപത്യ പ്രക്രിയയുടെ ഭാഗമാണെന്നും, നാട്ടുകാർ ഇത് കണ്ട് ആസ്വദിക്കുകയാണെന്നും അദ്ദേഹം കൂട്ടിച്ചേർത്തു.
അതേസമയം, കോൺഗ്രസിനുള്ളിൽ മുഖ്യമന്ത്രി സ്ഥാനത്തെ ചൊല്ലി ചേരിതിരിഞ്ഞുള്ള തർക്കങ്ങൾ തുടരുകയാണ്. എഐസിസി നിരീക്ഷകരായ മുകുൾ വാസ്നിക്, അജയ് മാക്കൻ എന്നിവർ കേരളത്തിലെ ചർച്ചകൾ സംബന്ധിച്ച റിപ്പോർട്ട് ഹൈക്കമാൻഡിന് കൈമാറാൻ ഒരുങ്ങുകയാണ്. ഇതിനിടെ, വി ഡി സതീശനെ മുഖ്യമന്ത്രിയാക്കണമെന്ന ആവശ്യവുമായി മുസ്ലീം ലീഗ് സമ്മർദ്ദം ശക്തമാക്കിയിട്ടുണ്ട്. കെ സി വേണുഗോപാലിനേക്കാൾ ജനപിന്തുണ വി ഡി സതീശനാണെന്നും, ഘടകകക്ഷികളുടെ അഭിപ്രായങ്ങൾ കോൺഗ്രസ് മാനിക്കണമെന്നും ലീഗ് നേതൃത്വം നിരീക്ഷകരെ അറിയിച്ചിട്ടുണ്ട്.
Photo and News Source: Kairali News
