കേരളത്തിലെ പുതിയ മുഖ്യമന്ത്രിയെ തീരുമാനിക്കുന്നതുമായി ബന്ധപ്പെട്ട് എഐസിസി നിരീക്ഷകരായ അജയ് മാക്കനും മുകുൾ വാസ്നികും കോൺഗ്രസ് അദ്ധ്യക്ഷൻ മല്ലികാർജുനൻ ഖാർഗെയ്ക്ക് റിപ്പോർട്ട് സമർപ്പിച്ചു. രാവിലെ ഖാർഗെയുടെ വസതിയിലെത്തിയാണ് ഇരുവരും റിപ്പോർട്ട് കൈമാറിയത്. റിപ്പോർട്ട് വിശദമായി പരിശോധിച്ച ശേഷം ഉചിതമായ തീരുമാനമെടുക്കുമെന്ന് അജയ് മാക്കൻ മാധ്യമങ്ങളോട് പറഞ്ഞു. മുഖ്യമന്ത്രിയെ സംബന്ധിച്ച പ്രഖ്യാപനം വൈകാതെ തന്നെ ഉണ്ടാകുമെന്നും അദ്ദേഹം വ്യക്തമാക്കി.
അതേസമയം, എംഎൽഎമാരുടെ പിന്തുണ രേഖപ്പെടുത്തിയതെന്ന പേരിൽ പ്രചരിക്കുന്ന ചിത്രങ്ങൾ വ്യാജമാണെന്ന് മുകുൾ വാസ്നിക് തള്ളിക്കളഞ്ഞു. ഹൈക്കമാൻഡ് നിരീക്ഷകർ തയ്യാറാക്കിയ ഔദ്യോഗിക രേഖയല്ല ഇതെന്നും അദ്ദേഹം വ്യക്തമാക്കി. ന്യൂ ഇന്ത്യൻ എക്സ്പ്രസ് പുറത്തുവിട്ട ഈ പട്ടികയിൽ ചില എംഎൽഎമാരുടെ പേരുകളും അവർ പിന്തുണയ്ക്കുന്ന നേതാക്കളുടെ പേരും രേഖപ്പെടുത്തിയിരുന്നു.
ഈ പട്ടികയിൽ സന്ദീപ് വാര്യർ, സജീവ് ജോസഫ്, ടി.ഒ മോഹനൻ, സണ്ണി ജോസഫ്, ഉഷ വിജയൻ, ഐ സി ബാലകൃഷ്ണൻ, ടി. സിദ്ധിഖ് തുടങ്ങിയവരുടെ പേരുകൾ ഉൾപ്പെട്ടിരുന്നു. കെ.സി വേണുഗോപാൽ, രമേശ് ചെന്നിത്തല എന്നിവരെ സൂചിപ്പിക്കുന്ന രീതിയിലാണ് പേരുകൾക്ക് നേരെ കുറിപ്പുകൾ ഉണ്ടായിരുന്നത്. എന്നാൽ, ഈ വിവരങ്ങൾ നിരീക്ഷകരുടെ ഔദ്യോഗിക രേഖയല്ലെന്ന് ഹൈക്കമാൻഡ് ആവർത്തിച്ചു. പട്ടികയിൽ തന്റെ പേര് ഉൾപ്പെട്ടിട്ടും പിന്തുണ രേഖപ്പെടുത്താത്തതിൽ ഉദുമ നിയുക്ത എംഎൽഎ കെ. നീലകണ്ഠൻ നേരത്തെ ഹൈക്കമാൻഡിന് പരാതി നൽകിയിരുന്നു.
Photo and News Source: Kerala Kaumudi Latest
