ചെന്നൈ നെഹ്റു ഇൻഡോർ സ്റ്റേഡിയത്തിൽ നടക്കുമെന്ന് കരുതിയ ടിവികെ നേതാവ് വിജയ്യുടെ സത്യപ്രതിജ്ഞാ ചടങ്ങ് കാണാനെത്തിയ ആയിരക്കണക്കിന് ആരാധകർ കടുത്ത നിരാശയോടെ മടങ്ങി. പരിപാടി മാറ്റിവെച്ച വിവരം അറിയാതെ ദൂരസ്ഥലങ്ങളിൽ നിന്നുപോലും എത്തിയ പ്രവർത്തകർ സ്റ്റേഡിയത്തിന്റെ ഗേറ്റുകൾ പൂട്ടിയിട്ടിരിക്കുന്നത് കണ്ട് അമ്പരന്നു. അരുമ്പാക്കം, കോയമ്പത്തൂർ തുടങ്ങിയ സ്ഥലങ്ങളിൽ നിന്ന് വലിയ പ്രതീക്ഷകളോടെയാണ് ഇവർ ചെന്നൈയിൽ എത്തിയത്.
വിജയ് മുഖ്യമന്ത്രിയായി സത്യപ്രതിജ്ഞ ചെയ്യുന്നത് കാണാൻ സാധിക്കുമെന്ന ആവേശത്തിലായിരുന്നു ആരാധകർ. എന്നാൽ, സ്റ്റേഡിയത്തിന് മുന്നിലെത്തിയപ്പോൾ ലഭിച്ച നിരാശാജനകമായ മറുപടി പലരെയും കണ്ണീരിലാഴ്ത്തി. 'വിജയ് മുഖ്യമന്ത്രിയാകുമെന്ന് കരുതി ഞങ്ങൾ വളരെയധികം സന്തോഷത്തോടെയാണ് വന്നത്, പക്ഷേ ഇവിടെ ഒന്നുമില്ല. ഗേറ്റുകൾ അടച്ചിരിക്കുന്നു. ഇത് വളരെ വേദനാജനകമാണ്,' എന്ന് ടിവികെ അനുയായി ചാരുലത പ്രതികരിച്ചു.
കാഴ്ചപരിമിതിയുള്ള ഗുണസുന്ദരി എന്ന പ്രവർത്തകയും തന്റെ നിരാശ പങ്കുവെച്ചു. മകനോട് പോലും പറയാതെയാണ് താൻ ചടങ്ങ് കാണാൻ എത്തിയതെന്ന് അവർ പറഞ്ഞു. ഗേറ്റുകൾ അടച്ചിട്ടിരിക്കുന്നത് വലിയൊരു ഞെട്ടലാണ് സമ്മാനിച്ചതെന്ന് അവർ കൂട്ടിച്ചേർത്തു. കൃത്യമായ അറിയിപ്പുകൾ ലഭിക്കാത്തതാണ് പ്രവർത്തകരുടെ ഈ ദുരവസ്ഥയ്ക്ക് കാരണമായത്.
അതേസമയം, സർക്കാർ രൂപീകരണത്തിനായുള്ള തിരക്കിട്ട നീക്കങ്ങൾ വിജയ് തുടരുകയാണ്. ഗവർണർ രാജേന്ദ്ര ആർലേക്കറുമായി അദ്ദേഹം വീണ്ടും കൂടിക്കാഴ്ച നടത്തി. നിയമസഭയിൽ ഭൂരിപക്ഷം തെളിയിക്കുമെന്ന് വിജയ് ഉറപ്പിച്ചു പറഞ്ഞു. ഇതിന്റെ ഭാഗമായി ടിവികെയുടെ തെരഞ്ഞെടുക്കപ്പെട്ട എംഎൽഎമാരുടെ അടിയന്തര യോഗവും അദ്ദേഹം വിളിച്ചുചേർത്തിട്ടുണ്ട്.
Photo and News Source: Samakalika Malayalam
