വിഷ്ണു ഉണ്ണികൃഷ്ണൻ നായകനായി എത്തുന്ന 'റിവോൾവർ റിങ്കോ' നാളെ തിയേറ്ററുകളിലേക്ക് എത്തുകയാണ്. സംവിധായകൻ കിരൺ നാരായണൻ ഒരുക്കുന്ന ഈ ചിത്രം, സൂപ്പർ നാച്ചുറൽ കഥാപാത്രങ്ങളെ ആരാധിക്കുന്ന ഒരു കൂട്ടം കുട്ടികളുടെയും, അവരുടെ സ്വപ്നങ്ങൾ സാക്ഷാത്കരിക്കാൻ സഹായിക്കുന്ന പ്രിയേഷ് എന്ന യുവാവിന്റെയും കഥയാണ് പറയുന്നത്. ചിത്രത്തിന്റെ ട്രെയിലറിന് ഇതിനോടകം തന്നെ മികച്ച പ്രേക്ഷക സ്വീകാര്യത ലഭിച്ചുകഴിഞ്ഞു.
സിനിമയുടെ പ്രമേയത്തെക്കുറിച്ച് സംവിധായകൻ കിരൺ നാരായണൻ ഏഷ്യാനെറ്റ് ന്യൂസിനോട് മനസ്സ് തുറന്നു. എൺപതുകളിൽ പാലക്കാട് ഭാഗത്ത് നിന്ന് പുറത്തിറങ്ങിയിരുന്ന ചെറിയ കോമിക്സ് പുസ്തകങ്ങളിൽ നിന്നാണ് 'റിവോൾവർ റിങ്കോ' എന്ന പേര് ലഭിച്ചത്. ഒരു വലിയ ആഗ്രഹത്തിന് പിന്നാലെ പോകുന്ന കുട്ടികളുടെ നിഷ്കളങ്കതയും, അത് നേടിയെടുക്കാൻ അവർ നേരിടുന്ന വെല്ലുവിളികളുമാണ് സിനിമയുടെ പ്രധാന ഇതിവൃത്തം.
ചിത്രത്തിന്റെ പ്രചോദനത്തെക്കുറിച്ച് സംസാരിക്കവേ, 1981-ൽ പുറത്തിറങ്ങിയ ഹോളിവുഡ് ക്ലാസിക് ചിത്രം 'ഇന്ത്യാന ജോൺസ്: റൈഡേഴ്സ് ഓഫ് ദി ലോസ്റ്റ് ആർക്' (Indiana Jones: Raiders of the Lost Ark) ആണ് തനിക്ക് പ്രചോദനമായതെന്ന് കിരൺ നാരായണൻ വ്യക്തമാക്കി. ആ സിനിമ കണ്ട് പ്രചോദനം ഉൾക്കൊണ്ട്, അമേരിക്കയിലെ ഒരു കൂട്ടം കുട്ടികൾ വർഷങ്ങളോളം കഷ്ടപ്പെട്ട് ആ ചിത്രം അതേപടി റീക്രിയേറ്റ് ചെയ്ത കഥ തന്നെ ഏറെ സ്വാധീനിച്ചു. കുട്ടികളുടെ പ്രകടനത്തിന് പ്രാധാന്യം നൽകുന്ന ഈ ചിത്രം കുടുംബ പ്രേക്ഷകർക്കും കുട്ടികൾക്കും ഒരുപോലെ ആസ്വദിക്കാൻ കഴിയുന്ന രീതിയിലാണ് ഒരുക്കിയിരിക്കുന്നത്.
Photo and News Source: Asianet News
