ഉറക്കം ആഗ്രഹിക്കുന്ന സമയത്ത് കൂർക്കംവലി പലർക്കും ഒരു വലിയ പ്രശ്നമായി മാറാറുണ്ട്. ഉറക്കത്തിന്റെ ഗുണനിലവാരം ഗണ്യമായി കുറയ്ക്കുന്ന കൂർക്കംവലി ശാരീരികവും മാനസികവുമായ ആരോഗ്യത്തെ പ്രതികൂലമായി ബാധിക്കാം. ഇതിന് പരിഹാരമായി ജീവിതരീതിയിൽ ചില മാറ്റങ്ങൾ വരുത്തുന്നത് നല്ലതാണ്. ഉറങ്ങുമ്പോൾ നാക്കും അണ്ണാക്കും തൊണ്ടയുടെ പിൻഭാഗത്തേക്ക് നീങ്ങുന്നത് ശ്വാസനാളത്തെ ഇടുങ്ങിയതാക്കുകയും കൂർക്കംവലിക്ക് കാരണമാവുകയും ചെയ്യും. ഇതിന് പരിഹാരമായി വശങ്ങളിലേക്ക് കിടന്ന് ഉറങ്ങുന്നത് നല്ലതാണ്. കൂടാതെ, ശരീരഭാരം കൂടുമ്പോൾ കഴുത്തിനും തൊണ്ടയ്ക്കും ചുറ്റുമുള്ള ഭാരം ശ്വാസനാളത്തിൽ സമ്മർദം ചെലുത്തുകയും കൂർക്കംവലിക്ക് കാരണമാവുകയും ചെയ്യും. അതിനാൽ, ശരീരഭാരം കുറയ്ക്കുന്നത് കൂർക്കംവലി കുറയ്ക്കാനും ആരോഗ്യം മെച്ചപ്പെടുത്താനും സഹായിക്കും.
പുകവലി ശ്വാസനാളത്തെ അലോസരപ്പെടുത്തുകയും വീക്കം ഉണ്ടാക്കുകയും ചെയ്യും. ഇത് ശ്വാസനാളം ചുരുങ്ങാനും കൂർക്കംവലി കൂടാനും കാരണമാകുന്നു. പുകവലി ഉപേക്ഷിക്കുന്നത് വീക്കം കുറയ്ക്കാനും ശ്വാസനാളത്തിന്റെ പ്രവർത്തനം മെച്ചപ്പെടുത്താനും കൂർക്കംവലി കുറയ്ക്കാനും സഹായിക്കും. മദ്യം, മയക്കമരുന്നുകൾ, ഉറക്ക ഗുളികകൾ എന്നിവ തൊണ്ടയിലെ പേശികളെ അയവുള്ളതാക്കുകയും കൂർക്കംവലി കൂടാൻ കാരണമാവുകയും ചെയ്യും. ഉറക്കത്തിന്റെ ഗുണനിലവാരം മെച്ചപ്പെടണമെങ്കിൽ ഉറങ്ങുന്നതിന് മുമ്പ് ഇവ ഒഴിവാക്കേണ്ടതാണ്. കൂടാതെ, ഉറക്കത്തിന് സ്ഥിരമായ ഒരു സമയക്രമം പാലിക്കുന്നത് നല്ല ഉറക്കത്തിന് സഹായിക്കും. ഉറങ്ങുന്നതിന് മുമ്പ് അൽപസമയം റിലാക്സ് ചെയ്യുന്നതും കിടക്കുന്ന ഇടം ശുചിയും സുഗമവുമാക്കുന്നതും ഉറക്കം മെച്ചപ്പെടുത്താൻ സഹായിക്കും.
തൊണ്ടയിലെയും നാവിലെയും പേശികളെ ശക്തിപ്പെടുത്തുന്നത് കൂർക്കംവലി കുറയ്ക്കാൻ സഹായിക്കും. പാട്ട് പരിശീലിക്കുന്നതും വാദ്യോപകരണങ്ങൾ വായിക്കുന്നതും ഇതിന് നല്ലതാണ്. അല്ലെങ്കിൽ, പ്രത്യേക വ്യായാമങ്ങൾ ചെയ്യുന്നതും ഫലപ്രദമാണ്. തലയിണകളിൽ അടിയുന്ന പൊടിപടലങ്ങളും കൂർക്കംവലിക്ക് കാരണമാകാറുണ്ട്. അതിനാൽ, തലയിണകൾ പതിവായി മാറ്റേണ്ടതാണ്. കൂടാതെ, വളർത്തുമൃഗങ്ങളെ കട്ടിലിൽ കിടത്തുന്നത് ഒഴിവാക്കേണ്ടതുമാണ്. മൂക്കിൽ സ്രവങ്ങൾ കട്ടപിടിക്കുന്നതും കൂർക്കംവലി കൂടാൻ കാരണമാകുന്നു. ഇത് തടയാൻ എല്ലാ ദിവസവും ആവശ്യത്തിന് വെള്ളം കുടിക്കുന്നത് പ്രധാനമാണ്. ഈ ചെറിയ മാറ്റങ്ങൾ കൂർക്കംവലി കുറയ്ക്കാനും ഉറക്കത്തിന്റെ ഗുണനിലവാരം മെച്ചപ്പെടുത്താനും സഹായിക്കും.
Photo and News Source: Samakalika Malayalam
