കൽക്കത്ത: പശ്ചിമ ബംഗാളിൽ ഭാരതീയ ജനതാ പാർട്ടി നേടിയ ചരിത്രപരമായ വിജയത്തെ തുടർന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് പ്രധാനമന്ത്രി നരേന്ദ്ര മോദിയെ അഭിനന്ദിച്ചു. ഈ വിജയം “ചരിത്രപരവും നിർണായകവുമായ വിജയം” എന്നാണ് ട്രംപ് വിശേഷിപ്പിച്ചത്. വൈറ്റ് ഹൗസ് പുറത്തിറക്കിയ പ്രസ്താവനയിൽ, മോദിയെപ്പോലൊരു നേതാവിനെ ലഭിക്കാൻ ഇന്ത്യ ഭാഗ്യം ചെയ്തതാണെന്നും, പശ്ചിമ ബംഗാളിൽ ബിജെപി ആദ്യമായി അധികാരം പിടിച്ചതിനാൽ ഇത് വലിയ രാഷ്ട്രീയ മാറ്റമാണെന്നും ചൂണ്ടിക്കാട്ടിയിട്ടുണ്ട്. ജനാധിപത്യ പ്രക്രിയയിൽ ജനങ്ങൾ നൽകിയ ശക്തമായ പിന്തുണയുടെ പ്രതിഫലമാണെന്നും, മോദിയുടെ നേതൃത്വത്തെ പ്രശംസിക്കുന്നുവെന്നും പ്രസ്താവനയിൽ വ്യക്തമാക്കിയിരിക്കുന്നു.
തെരഞ്ഞെടുപ്പിന് മുന്നോടിയായി ഇരു നേതാക്കളും ഫോണിൽ സംസാരിച്ചിരുന്നു. ഇത് ആഗോളതലത്തിൽ മോദിയുടെയും ബിജെപിയുടെയും സ്വാധീനം വർധിക്കുന്നതിന്റെ സൂചനയായി രാഷ്ട്രീയ നിരീക്ഷകർ കാണുന്നു. രവീന്ദ്രനാഥ ടാഗോറിന്റെ ജന്മദിനമായ മെയ് 9-ന് പുതിയ ബിജെപി സർക്കാർ അധികാരമേൽക്കുമെന്നും, ബംഗാളിന്റെ സാംസ്കാരിക പൈതൃകത്തിന് പ്രാധാന്യം നൽകുന്ന ചടങ്ങായിരിക്കുമെന്നും ബിജെപി നേതൃത്വം അറിയിച്ചു.
ബംഗാൾ നിയമസഭാ തെരഞ്ഞെടുപ്പിൽ തൃണമൂൽ കോൺഗ്രസിനെ തകർത്തുകൊണ്ട് ബിജെപി അധികാരത്തിലേറി. 294 അംഗ നിയമസഭയിൽ 207 സീറ്റുകൾ നേടിയാണ് ബിജെപി ബംഗാളിൽ ആദ്യമായി അധികാരം ഉറപ്പിച്ചത്. മമത ബാനർജിയുടെ നേതൃത്വത്തിലുള്ള 15 വർഷത്തെ തൃണമൂൽ ഭരണത്തിന് അന്ത്യമായതോടെ, ബംഗാളിൽ പുതിയ രാഷ്ട്രീയ അധികാര കൈമാറ്റം നടന്നു. 2021-ൽ 38 ശതമാനമായിരുന്ന ബിജെപിയുടെ വോട്ട് വിഹിതം ഇത്തവണ ഗണ്യമായി വർധിച്ചു. സ്വന്തം തട്ടകമായ ഭവാനിപൂരിൽ മമത ബാനർജി പരാജയപ്പെട്ടത് തൃണമൂലിന് കനത്ത ആഘാതമായി.
ബിജെപിയുടെ സുവേന്ദു അധികാരി 15,105 വോട്ടുകൾക്ക് മമതയെ പരാജയപ്പെടുത്തി. മമത മന്ത്രിസഭയിലെ 63 ശതമാനം മന്ത്രിമാരും പരാജയപ്പെട്ടു. തെരഞ്ഞെടുപ്പിൽ ക്രമക്കേട് നടന്നുവെന്ന് ആരോപിച്ച് മമത ബാനർജി രംഗത്തെത്തിയിട്ടുണ്ട്. എന്നാൽ, തെരഞ്ഞെടുപ്പ് കമ്മീഷൻ ഈ ആരോപണങ്ങളെ നിരാകരിച്ചു. ബംഗാളിലെ രാഷ്ട്രീയ ഭൂപടം മാറ്റിമറിക്കുന്ന വിജയമായാണ് ഈ തിരഞ്ഞെടുപ്പ് വിശേഷിപ്പിക്കപ്പെടുന്നത്.
Photo and News Source: Kerala Online News
