ഡൽഹി: ലോക്സഭ പ്രതിപക്ഷ നേതാവും കോൺഗ്രസ് എം.പി.യുമായ രാഹുൽ ഗാന്ധി ബിജെപിക്കും പ്രധാനമന്ത്രി നരേന്ദ്ര മോദിക്കുമെതിരെ കടുത്ത വിമർശനങ്ങൾ ഉയർത്തിയിട്ടുണ്ട്. തിരഞ്ഞെടുപ്പ് പ്രക്രിയയിൽ കൃത്രിമവും വോട്ടുമോഷണവും നടത്തിയാണ് ബിജെപി അധികാരത്തിൽ തുടരുന്നതെന്ന് അദ്ദേഹം ആരോപിച്ചു. ബുധനാഴ്ച തന്റെ എക്സ് ഹാൻഡിൽ വഴി രാഹുൽ ഗാന്ധി ഈ ആരോപണങ്ങൾ ഉന്നയിച്ചു. ബിജെപിയുടെ 240 എം.പിമാരിൽ ആറിലൊരാളെങ്കിലും 'വോട്ട് മോഷണത്തിലൂടെ' ജയിച്ചവരാണെന്ന് അദ്ദേഹം അവകാശപ്പെട്ടു.
വോട്ട് മോഷ്ടിച്ച് ജയിച്ച എം.പിമാരെ ബിജെപിയുടെ ഭാഷയിൽ 'നുഴഞ്ഞുകയറ്റക്കാർ' എന്ന് വിളിക്കണമെന്ന് രാഹുൽ പരിഹസിച്ചു. ഹരിയാനയിലെ ഭരണത്തെ 'നുഴഞ്ഞുകയറ്റക്കാരുടെ സർക്കാർ' എന്ന് വിശേഷിപ്പിക്കുകയും ചെയ്തു. തിരഞ്ഞെടുപ്പ് സുതാര്യമായി നടത്തേണ്ട ഉത്തരവാദിത്തമുള്ള സ്ഥാപനങ്ങൾ ഇന്ന് 'റിമോട്ട് കൺട്രോളിന്' കീഴിലാണെന്നും അദ്ദേഹം ആരോപിച്ചു. വോട്ടർ പട്ടികയിലൂടെയും മറ്റും തിരിമറികൾ നടക്കുന്നുണ്ടെന്നും അദ്ദേഹം ചൂണ്ടിക്കാണിച്ചു.
'ഇന്ത്യയിൽ നിഷ്പക്ഷമായ തിരഞ്ഞെടുപ്പ് നടന്നാൽ ബിജെപിക്ക് 140 സീറ്റുകൾ പോലും ലഭിക്കില്ല. സത്യത്തെ അവർ ഭയപ്പെടുന്നു' എന്ന് രാഹുൽ ഗാന്ധി പറഞ്ഞു. ബംഗാളിലും അസ്സാമിലുമുള്ള നിയമസഭാ തിരഞ്ഞെടുപ്പ് ഫലങ്ങളെ 'ജനവിധി മോഷ്ടിക്കൽ' എന്ന് വിശേഷിപ്പിക്കുകയും, ഇത്തരം പ്രവണതകൾ ഇന്ത്യൻ ജനാധിപത്യത്തിന്റെ നാശത്തിന് കാരണമാകുമെന്ന് മുന്നറിയിപ്പ് നൽകി. ഇത് ഏതെങ്കിലും ഒരു പാർട്ടിയുടെ പ്രശ്നമല്ല, ഇന്ത്യയുടെ നിലനില്പിന്റെ പ്രശ്നമാണെന്ന് ഓർമ്മിപ്പിച്ചു.
വ്യക്തിപരമായ രാഷ്ട്രീയ താത്പര്യങ്ങൾ മാറ്റിവെച്ച് ജനാധിപത്യം സംരക്ഷിക്കാൻ എല്ലാവരും ഒന്നിക്കണമെന്ന് കോൺഗ്രസ് പ്രവർത്തകരോടും മറ്റ് പാർട്ടികളോടും അദ്ദേഹം അഭ്യർത്ഥിച്ചു.
Photo and News Source: Sathyam Online
