ഇന്ത്യയിലെ വാണിജ്യ വാഹന വിപണിയിൽ പ്രമുഖ സ്ഥാനത്തുള്ള ടാറ്റ മോട്ടോർസ്, തങ്ങളുടെ പ്രശസ്തമായ എയ്സ് വാഹന ശ്രേണിയുടെ 21-ാം വാർഷിക ആഘോഷത്തിന്റെ ഭാഗമായി പുതിയ 'എയ്സ് ഗോൾഡ് പ്ലസ് XL' മോഡൽ പുറത്തിറക്കിയതായി പ്രഖ്യാപിച്ചു. ലാസ്റ്റ് മൈൽ ലോജിസ്റ്റിക്സ് മേഖലയിലെ മാറിക്കൊണ്ടിരിക്കുന്ന ആവശ്യങ്ങൾ നിറവേയ്ക്കുന്നതിനായി ലൈറ്റ് കൊമേഴ്സ്യൽ വാഹന നിരയെ വിപുലീകരിക്കുകയാണ് കമ്പനി ലക്ഷ്യമിടുന്നത്. ഉയർന്ന ലോഡ് വഹിക്കാനുള്ള കഴിവ്, കൂടുതൽ കാർഗോ സ്പെയ്സ്, ഭാരമേറിയ വസ്തുക്കൾ കയറ്റുമതി ചെയ്യാനുള്ള സൗകര്യം എന്നിവയാണ് ഈ പുതിയ വേരിയന്റിന്റെ പ്രത്യേകതകൾ. 8 അടി നീളമുള്ള ലോഡ് ബോഡിയും 1 ടൺ പേലോഡ് ശേഷിയും ഉള്ള ഈ മോഡൽ, സിഎൻജി, പെട്രോൾ, ഡീസൽ, ഇലക്ട്രിക് എന്നിങ്ങനെ വിവിധ ഇന്ധന ഓപ്ഷനുകളിൽ ലഭ്യമാകും.
ടാറ്റ എയ്സിനെ ആശ്രയിക്കുന്ന സംരംഭകരെ ചുറ്റിപ്പറ്റിയുള്ള രാജ്യവ്യാപകമായ 'ഇക്കിസ് സാൽ ബെമിസാൽ' കാമ്പെയ്നിന്റെ ഭാഗമായാണ് പുതിയ മോഡൽ പ്രഖ്യാപിച്ചത്. ഈ കാമ്പെയ്നിന്റെ ഭാഗമായി, വനിതാ സംരംഭകർക്കായി 21,000 രൂപ വരെ അധിക ആനുകൂല്യങ്ങളും ടാറ്റ മോട്ടോർസ് പ്രഖ്യാപിച്ചു. 'പുതിയ എയ്സ് ഗോൾഡ് പ്ലസ് XL പുറത്തിറക്കിയതോടെ ഇന്ത്യയിലെ ഏറ്റവും പരിവർത്തനാത്മകമായ വാണിജ്യ വാഹനത്തിന്റെ അടുത്ത അധ്യായത്തിലേക്ക് തങ്ങൾ മുന്നേറുകയാണെന്ന്' ടാറ്റ മോട്ടോർസ് ലിമിറ്റഡിന്റെ വൈസ് പ്രസിഡന്റും ബിസിനസ് തലവനുമായ പിനാകി ഹൽദാർ അഭിപ്രായപ്പെട്ടു. ഉയർന്ന ലോഡ് ഉപയോഗങ്ങളിൽ എയ്സിനുള്ള പ്രസക്തി വിപുലീകരിക്കുകയാണ് ഈ മോഡലിന്റെ ലക്ഷ്യമെന്നും അദ്ദേഹം വ്യക്തമാക്കി.
ടാറ്റയുടെ കണക്കുകൾ പ്രകാരം, ഓരോ 4.25 മിനിറ്റിലും ഒരു എയ്സ് വാഹനം വിറ്റഴിക്കപ്പെടുന്നുണ്ട്. നിലവിൽ രാജ്യത്തുടനീളമുള്ള 26 ലക്ഷത്തിലധികം ഉടമകളുടെ വിശ്വാസവും ബഹുമാനവും നേടിക്കൊണ്ട് ടാറ്റ എയ്സ് കുതിച്ചുകയറുകയാണ്. ഡീസൽ എക്സോസ്റ്റ് ഫ്ലൂയിഡിന്റെ ആവശ്യകത ഇല്ലാതാക്കുന്ന 'അഡ്വാൻസ്ഡ് ലീൻ നോക്സ് ട്രാപ്പ്' സാങ്കേതികവിദ്യയാണ് ഈ മോഡലിൽ ഉപയോഗിക്കുന്നത്. ഇത് കുറഞ്ഞ ഓണർഷിപ്പ് കോസ്റ്റ്, മെച്ചപ്പെട്ട പ്രവർത്തന സമയം, കൂടുതൽ മനസമാധാനം എന്നിവ ഉടമകൾക്ക് നൽകുന്നു. 700 സിസി ടർബോചാർജ്ഡ് ഡീസൽ എഞ്ചിനാണ് ഈ മോഡലിൽ പ്രവർത്തിക്കുന്നത്. 22 bhp പവറും 55 Nm ടോർക്കും നൽകുന്ന ഈ വാഹനം സ്ഥിരതയുള്ളതും വിശ്വസനീയവുമായ പ്രകടനത്തിനായി രൂപകൽപ്പന ചെയ്തിരിക്കുന്നു.
ടാറ്റ മോട്ടോർസിന്റെ ചെറുകിട വാണിജ്യ വാഹന ശ്രേണിയുടെ ഭാഗമാണ് എയ്സ് ഗോൾഡ് പ്ലസ് XL. ഈ ശ്രേണിയിൽ എയ്സ് പ്രോ, എയ്സ്, ഇൻട്ര, യോദ്ധ എന്നിവ ഉൾപ്പെടുന്നു. 750 കിലോഗ്രാം മുതൽ 2 ടൺ വരെ പേലോഡ് ശേഷിയുള്ള വിശാലമായ ശ്രേണിയാണ് ഈ നിരയിൽ ഉൾപ്പെടുന്നത്. ഡീസൽ, പെട്രോൾ, സിഎൻജി, ബൈ-ഫ്യൂവൽ, ഇലക്ട്രിക് പവർട്രെയിനുകൾ എന്നിവ ലഭ്യമാക്കുന്നതിനാൽ വിവിധ ആവശ്യങ്ങൾക്കനുയോജ്യമായ വാഹനമാണിത്. ടാറ്റ മോട്ടോർസിന്റെ '2.0 ലൈഫ് സൈക്കിൾ സപ്പോർട്ട് പ്രോഗ്രാം' പ്രകാരം 2,500-ലധികം സർവീസ് സെന്ററുകളിലൂടെ ഈ വാഹനത്തിന് പൂർണ്ണ പിന്തുണ ലഭിക്കും.
Photo and News Source: DriveSpark
